آکولہ میں سنسنی! گھر کی شیشے کی کھڑکی توڑ کر چیتے کی خوفناک جست، علاقے میں کھلبلی مچ گئی
آکولہ،۲۱؍ نومبر (ڈاکٹر محمد راغب دیشمکھ کی خصوصی رپورٹ)شہر کے نیو تاپڑیا نگر علاقے میں ایک گھر کے ٹاور کی شیشے کی کھڑکی توڑ کر ایک چیتے نے سیدھی سڑک پر جست لگا دی۔ یہ ہولناک واقعہ جمعہ کے روز پیش آیا۔ اس کے بعد چیتا وہاں سے دوسرے رخ بھاگ گیا۔ واقعے کے بعد علاقے سمیت پورے شہر میں کھلبلی مچ گئی اور خوف و ہراس کا ماحول پیدا ہوگیا۔ محکمہ جنگلات کی ٹیم نے فوری طور پر جائے وقوعہ پر پہنچ کر چیتے کی تلاش شروع کر دی۔ اس واقعہ کی شہر میں خوب چرچا ہے۔ریاست میں جنگلی جانور اب تیزی سے شہروں کا رخ کر رہے ہیں۔
مختلف شہروں میں چیتے دکھائی دے رہے ہیں۔ چیتے کے حملوں میں کئی افراد زخمی ہوئے ہیں جبکہ کچھ کی جانیں بھی جا چکی ہیں۔ اس وجہ سے عام لوگوں میں سخت دہشت پھیلی ہوئی ہے۔ اسی دوران آکولہ کے نیو تاپڑیا نگر علاقے میں بھی جمعہ کو چیتا دیکھے جانے کی خبر نے لوگوں میں کھلبلی مچا دی۔نیو تاپڑیا نگر کے رہائشی اور پولیس اہلکار ویلاس بنکاوار کے گھر کی ٹاور ونڈو کے شیشے کو توڑ کر چیتے نے باہر چھلانگ لگائی، جیسا کہ مقامی لوگوں نے بتایا۔ اس اچانک واقعے سے پورے علاقے میں خوف کی لہر دوڑ گئی۔ شہریوں میں شدید گھبراہٹ پیدا ہوگئی۔
واقعے کی خبر جنگل کی آگ کی طرح پورے شہر میں پھیل گئی۔چیتے کے دکھائی دینے کی اطلاع ملتے ہی محکمہ جنگلات کی ٹیم فوراً موقع پر پہنچ گئی۔ محکمہ کے مطابق چیتا اس علاقے سے آگے نکل چکا ہے، اس لیے خطرہ فی الحال کم ہے۔ شہریوں سے محتاط رہنے اور ہوشیاری برتنے کی اپیل کی گئی ہے۔ محکمہ جنگلات کی ٹیمیں مسلسل علاقے کا معائنہ کر رہی ہیں۔ تاہم یہ سوال اب بھی برقرار ہے کہ آخر چیتا اس گھر تک کیسے پہنچا؟ اس سے قبل بھی اس علاقے میں چیتے کی موجودگی کی چرچا سامنے آئی تھی۔آکولہ ضلع کے تامسی شیٹ شیوار میں بھی حال ہی میں چیتا
دیکھا گیا ہے جس کی وجہ سے کسانوں اور گاؤں والوں میں خوف کا ماحول ہے۔ وگھالی نالے کے قریب شام کے وقت چیتے کے اچانک نظر آنے سے مقامی لوگوں میں کھلبلی مچ گئی۔ اسی دوران اب شہر کے نیو تاپڑیا نگر علاقے میں بھی چیتے کی آمد نے خوف کو مزید بڑھا دیا ہے۔نیو تاپڑیا نگر میں چیتے کی موجودگی کی اطلاع ملتے ہی محکمہ جنگلات کے اہلکار موقع پر پہنچے۔ ’’ابتدائی دیکھنے میں لگتا ہے کہ چیتا یہاں آکر واپس چلا گیا ہے۔ اس کی تلاش جاری ہے۔ شہری محتاط اور ہوشیار رہیں‘‘، یہ کہنا ہے بال کالنے، اعزازی وائلڈ لائف گارڈ، آکولہ کا۔
