ایئر انڈیا کی احمد آباد-لندن پرواز منسوخ، طیارہ حادثے کے بعد پہلی فلائٹ میں تکنیکی خرابی

احمد آباد، 17 جون 2025: گزشتہ ہفتے پیش آئے خوفناک فضائی حادثے کے بعد احمد آباد سے لندن کے لیے روانہ ہونے والی ایئر انڈیا کی پہلی پرواز AI-159 کو تکنیکی خرابی کے باعث اُڑان سے چند لمحے قبل منسوخ کر دیا گیا۔ اس اچانک فیصلے سے کئی مسافروں کو شدید پریشانی کا سامنا کرنا پڑا۔

یاد رہے کہ گزشتہ جمعرات کو ایئر انڈیا کی AI-171 فلائٹ، جو احمد آباد سے لندن کے لیے روانہ ہوئی تھی، اُڑان کے کچھ ہی منٹ بعد حادثے کا شکار ہو گئی تھی، جس میں تقریباً 275 افراد ہلاک ہو گئے تھے۔ مرنے والوں میں سے 135 افراد کی شناخت بھی کی جا چکی ہے۔

تکنیکی خرابی کی اطلاع پر پرواز منسوخ ذرائع کے مطابق، AI-159 کو حادثے کے بعد پہلی بار لندن کے لیے روانہ ہونا تھا، لیکن روانگی سے قبل معائنے کے دوران تکنیکی خرابی پائی گئی۔ حفاظتی نقطۂ نظر سے پرواز کو فوری طور پر منسوخ کر دیا گیا۔ فی الحال یہ واضح نہیں ہے کہ یہ فلائٹ کب دوبارہ شیڈول کی جائے گی۔

مسافروں کو شدید مشکلات منسوخی کی اطلاع سے راجکوٹ، آنند، ہلول اور کھمبات جیسے علاقوں سے آئے متعدد مسافروں کو شدید مایوسی کا سامنا کرنا پڑا۔ کئی مسافروں نے بتایا کہ پرواز دوپہر 1:10 بجے روانہ ہونے والی تھی، لیکن صبح سے ہی فلائٹ کی روانگی میں تاخیر کی خبریں گردش کر رہی تھیں۔ ایئر انڈیا کی ٹیم نے بعد میں باضابطہ اطلاع دی کہ فلائٹ رد کر دی گئی ہے۔

ایئر انڈیا کی دیگر پروازیں بھی متاثر ایئر انڈیا کو ان دنوں مسلسل تکنیکی و حفاظتی مسائل کا سامنا ہے: ہانگ کانگ سے دہلی آنے والی فلائٹ میں خرابی کے بعد واپس روانہ کیا گیا۔
امریکہ سے ممبئی آنے والی پرواز کو کولکاتا میں اتار کر تمام مسافروں کو باہر نکالا گیا۔
کوچی سے دہلی جا رہی پرواز کو ناگپور میں ہنگامی لینڈنگ کرنی پڑی، کیونکہ بم کی دھمکی موصول ہوئی تھی۔

احتیاطی اقدامات پر زور حادثے کے بعد بڑھتی تشویش کے پیش نظر ایئر انڈیا نے تمام پروازوں کی سخت جانچ پڑتال شروع کر دی ہے۔ ماہرین کا ماننا ہے کہ مستقبل میں ایسے واقعات کو روکنے کے لیے طیاروں کی معیاری دیکھ بھال اور فوری ردعمل ضروری ہے۔

مسافروں سے درخواست کی گئی ہے کہ وہ تازہ ترین معلومات کے لیے ایئر لائن کی ویب سائٹ اور کسٹمر سروس سے رابطے میں رہیں۔