بزرگ عالم دین اور تبلیغی جماعت کے فعال رکن مولانا محمد مستقیم بستوی کا انتقال، 105 برس کی عمر میں دارِفانی سے کوچ
ممبئی، 10 جون: تبلیغی جماعت کے معتبر، متحرک اور بزرگ رکن مولانا محمد مستقیم بستویؒ پیر کی شب تقریباً 12 بجے ممبئی کے علاقے سنجے نگر، پٹھان واڑی ملاڈ (مشرق) میں انتقال فرما گئے۔ ان کی عمر 105 برس سے زائد تھی۔ مولانا نے اپنی آخری سانس اپنے چھوٹے بیٹے حاجی محمد قاسم کی رہائش گاہ پر لی۔
منگل کے روز ان کا جسدِ خاکی بذریعہ طیارہ گورکھپور لے جایا گیا، جہاں سے بذریعہ ایمبولینس آبائی گاؤں تنہری، ضلع سنت کبیر نگر (اتر پردیش) روانہ کیا گیا۔ شب 9:30 بجے تدفین عمل میں آئی۔ تجہیز و تکفین میں علماء کرام، ائمہ مساجد، تبلیغی جماعت سے جڑے افراد، رشتہ داروں اور مقامی افراد نے بڑی تعداد میں شرکت کی۔
علمی و دعوتی خدمات: مولانا نے 1942ء میں مظاہر علوم سہارنپور سے فراغت حاصل کی۔ کچھ عرصہ تدریسی خدمات انجام دیں، لیکن جلد ہی دعوت و تبلیغ کے میدان کو اپنی زندگی کا مقصد بنا لیا۔ مرکز نظام الدین (دہلی) سے وابستہ ہو کر ملک اور بیرون ملک درجنوں ممالک میں اللہ کے پیغام کو پہنچانے کے لیے سفر کیے۔ ان کی زندگی کا ہر لمحہ اللہ کے بندوں کو ان کے رب سے جوڑنے میں گزرا۔
سادہ زندگی اور بلند اخلاق: مولانا مستقیمؒ کی شخصیت انتہائی منکسر المزاج، خوش اخلاق، سادہ طبیعت اور خدا ترس تھی۔ ان کی باتوں اور عمل سے اخلاص اور عاجزی نمایاں ہوتی تھی۔ ان کے قریبی افراد کا کہنا ہے کہ مولانا کی ساری زندگی دینی غیرت، تقویٰ اور دعوتی فکر سے بھرپور رہی۔
پسماندگان: مولانا کے پسماندگان میں دو بیٹے اور دس بیٹیاں شامل ہیں، جن میں سے پانچ بیٹیاں اور اہلیہ پہلے ہی وفات پا چکی ہیں۔
دعوت و تبلیغ کے میدان میں خدمات: جمعیۃ علماء شمال مغربی زون کے ذمہ دار مولانا محمد اسلم قاسمی (پٹھان واڑی) کے مطابق، مولانا محمد مستقیم نے 1960ء میں موضع اُسرا شہید میں دعوت و تبلیغ کا ایک اہم مرکز قائم کیا تھا، جس کے وہ سربراہ رہے۔ مولانا نے ایک موقع پر فرمایا تھا کہ ’’اللہ کا شکر ہے کہ مجھے پوری دنیا میں دعوت کے سفر کا موقع ملا۔‘‘
تعزیتی پیغام: مولانا کے انتقال پر دینی حلقوں میں گہرے رنج و غم کا ماحول ہے۔ مختلف جماعتوں اور تنظیموں نے ان کی خدمات کو خراجِ عقیدت پیش کرتے ہوئے ان کے لیے مغفرت اور درجات کی بلندی کی دعا کی ہے۔
إِنَّا لِلَّهِ وَإِنَّا إِلَيْهِ رَاجِعُونَ
اللہ تعالیٰ مولانا کی مغفرت فرمائے، درجات بلند فرمائے اور امت کو ان کا نعم البدل عطا فرمائے۔ آمین۔
