بیگم پیٹ ایئرپورٹ حیدرآباد کو بم سے اڑانے کی دھمکی، سیکیورٹی ادارے ہائی الرٹ پر
(حیدرآباد / نمائندہ خصوصی): حیدرآباد کے بیگم پیٹ ایئرپورٹ کو بدھ کی صبح بم سے اڑانے کی دھمکی موصول ہونے کے بعد سیکیورٹی ایجنسیوں اور پولیس میں کھلبلی مچ گئی۔ اطلاع ملتے ہی ائرپورٹ پر ہائی الرٹ نافذ کر دیا گیا اور تمام ٹرمینلز، پارکنگ ایریاز اور آس پاس کے علاقوں میں تفصیلی تلاشی مہم شروع کی گئی۔
پولیس کے مطابق دھمکی کی اطلاع صبح کے وقت ملی، جس کے بعد بم اسکواڈ، ڈاگ اسکواڈ اور دیگر حفاظتی ٹیموں کو فوری طور پر تعینات کیا گیا۔ ایئرپورٹ کے ہر حصے کی باریکی سے جانچ کی جا رہی ہے۔
ابتدائی اطلاعات کے مطابق دھمکی فون یا ای میل کے ذریعے موصول ہوئی، جسے سیکیورٹی اداروں نے سنجیدہ قرار دیا۔ این ایس جی اور انٹیلیجنس ایجنسیوں کو بھی چوکس کر دیا گیا ہے تاکہ کسی بھی ممکنہ خطرے سے نمٹا جا سکے۔
دوسری بڑی خبر: انڈیگو طیارے کی ناگپور میں ہنگامی لینڈنگ
اسی روز کی ایک اور اہم خبر کے مطابق منگل کو کوچی سے دہلی جانے والی انڈیگو کی پرواز کو بھی بم کی دھمکی کے بعد ناگپور ایئرپورٹ پر ہنگامی طور پر اتارنا پڑا۔
یہ پرواز مسقط سے کوچی پہنچی تھی اور صبح 9:31 بجے دہلی کے لیے روانہ ہوئی تھی۔ اسی دوران کوچی انٹرنیشنل ایئرپورٹ کے آفیشل ای میل پر ایک بم کی دھمکی موصول ہوئی۔ اس دھمکی کو سنجیدہ اور مخصوص نوعیت کی قرار دیتے ہوئے متعلقہ حکام کو فوری اطلاع دی گئی، اور پرواز کو ناگپور میں محفوظ طریقے سے لینڈ کرایا گیا۔
سیکیورٹی سخت، تحقیقات جاری ان مسلسل دھمکیوں کے بعد ملک بھر کے ہوائی اڈوں پر سیکیورٹی سخت کر دی گئی ہے۔ حیدرآباد ایئرپورٹ پر ابھی تک کوئی بم برآمد نہیں ہوا، تاہم تحقیقات جاری ہیں۔
پولیس کا کہنا ہے کہ دھمکی کی نوعیت سنگین ہے اور اسے کسی بھی صورت میں نظر انداز نہیں کیا جا سکتا۔ عوام کو افواہوں پر کان نہ دھرنے اور صرف مستند ذرائع سے معلومات حاصل کرنے کی اپیل کی گئی ہے۔
مزید تفصیلات کا انتظار ہے۔
