حوثی حملے کے بعد ایئر انڈیا کی تل ابیب پرواز ابوظہبی موڑ دی گئی، طیارہ دہلی واپس بھیجا جائے گا
نئی دہلی، 5 مئی (ایجنسی) حوثی باغیوں کے میزائل حملے کے سبب اسرائیل کے بین گوریان ہوائی اڈے کے قریب پیدا ہونے والی کشیدہ صورت حال کے پیش نظر، دہلی سے تل ابیب جانے والی ایئر انڈیا کی پرواز AI-139 کو ابوظہبی کے لیے موڑ دیا گیا۔ ایئر انڈیا کی جانب سے جاری سرکاری بیان میں کہا گیا ہے کہ مسافروں اور عملے کی حفاظت کو مدنظر رکھتے ہوئے تل ابیب کے لیے آنے اور جانے والی تمام پروازیں 6 مئی تک معطل کر دی گئی ہیں۔
یہ فیصلہ اس وقت لیا گیا جب پرواز اردن کی فضائی حدود میں داخل ہو چکی تھی اور لینڈنگ سے تقریباً ایک گھنٹہ قبل تھی۔ فلائٹ ریڈار 24 کے مطابق طیارہ بوئنگ 787 ماڈل کا تھا اور اسے اب دہلی واپس لایا جائے گا۔
ایئر لائن کے ترجمان نے کہا کہ زمینی عملہ متاثرہ مسافروں کی ہر ممکن مدد کر رہا ہے اور ان کے لیے متبادل سفر کے انتظامات کیے جا رہے ہیں۔ طیارے میں سوار تمام مسافر اور عملہ محفوظ ہیں۔
ادھر، بین گوریان ہوائی اڈے پر حوثی باغیوں کے بیلسٹک میزائل حملے کے بعد اسرائیلی وزیر اعظم بنجامن نیتن یاہو نے ایک ہنگامی سکیورٹی اجلاس طلب کیا ہے۔ ذرائع کے مطابق وہ شام کو سکیورٹی کابینہ کے ساتھ بھی تفصیلی مشاورت کریں گے تاکہ حوثی باغیوں کے خلاف ممکنہ جوابی کارروائی پر غور کیا جا سکے۔
رپورٹ کے مطابق، اگرچہ حملے کے دوران ہوائی اڈے پر لینڈنگ اور ٹیک آف روک دی گئی تھی، پھر بھی چھ افراد معمولی زخمی ہوئے جنہیں اسپتال میں طبی امداد فراہم کی جا رہی ہے۔ کوئی جانی نقصان نہیں ہوا ہے، تاہم سکیورٹی کی ناکامی پر سوالات اٹھ رہے ہیں۔
ایئر انڈیا کی جانب سے مزید اپ ڈیٹس جلد فراہم کیے جانے کی توقع ہے۔
