مالیگاؤں: اُمّید وقف پورٹل پر اب تک 200 املاک کا رجسٹریشن مکمل
آڈٹ اور سات بارہ نہ ہونے سے رجسٹریشن میں دشواریاں؛ وقف بورڈ افسر کا تعاون کا یقین
مالیگاؤں، صنعتی شہر — اُمّید وقف پورٹل پر مالیگاؤں کی دو سو سے زائد وقف املاک و جائیدادوں کے اندراج کی کارروائی مکمل کرلی گئی ہے۔ اگرچہ یہ عمل مطلوبہ رفتار سے آگے نہیں بڑھ رہا، تاہم وقف امور پر رضاکارانہ خدمات انجام دینے والے کارکنان مسلسل کوشش کررہے ہیں کہ متولیان اور ذمہ داران کو بیدار کرکے رجسٹریشن کی رفتار بڑھائی جائے۔
رجسٹریشن ہیلپ ڈیسک کا قیام
مائناریٹی ڈیفنس کمیٹی کی جانب سے حج ہاؤس مالیگاؤں میں وقف پورٹل رجسٹریشن ہیلپ ڈیسک قائم کیا گیا ہے۔ ہیلپ ڈیسک کے بانی عبدالحلیم صدیقی کے مطابق حکومت نے وقف املاک کے رجسٹریشن کی آخری تاریخ 5 دسمبر 2025 مقرر کی ہے، اس لیے تیز رفتاری سے رجسٹریشن کرنا ناگزیر ہوگیا ہے۔
ہیلپ ڈیسک کی بدولت مالیگاؤں اور مضافات کی مساجد، مدارس، خانقاہیں، مزارات اور دیگر اوقافی املاک کے متولیان کو رجسٹریشن میں نمایاں سہولت ہوئی ہے۔ اس سلسلے میں ہیلپ ڈیسک کے ماہرین کا وقف بورڈ کے نامزد نگران افسر برائے ناسک ضلع شیخ عاصم سے مستقل رابطہ جاری ہے تاکہ ٹرسٹیان کو درپیش مسائل جلد از جلد حل ہوسکیں۔
رجسٹریشن کے دوران پیش آنے والے اہم مسائل
ہیلپ ڈیسک کے بانی عبدالحلیم صدیقی نے بتایا کہ رجسٹریشن کے دوران زیادہ تر اداروں کو درج ذیل دو بڑے مسائل کا سامنا ہے:
1. آڈٹ مکمل نہ ہونا کئی اوقافی اداروں کا سرکاری سالانہ آڈٹ سالہا سال سے التوا کا شکار ہے، جس کی وجہ سے رجسٹریشن میں رکاوٹ پیش آتی ہے۔
2. سات بارہ میں وقف نام درج نہ ہونا کئی بیش قیمت وقف جائیدادیں خریدی تو جا چکی ہیں لیکن متعلقہ ادارے یا مقام کا نام اب تک سات بارہ کے اُتارے (زمین کی ملکیت کا بنیادی سرکاری ریکارڈ) میں درج نہیں ہے۔
ان دو کے علاوہ بھی مختلف تکنیکی رکاوٹیں سامنے آتی ہیں، مگر سب سے زیادہ عام یہی مسائل ہیں۔
وقف بورڈ افسر کی رہنمائی آڈٹ اور سات بارہ سے متعلق سوال پر نگران افسر شیخ عاصم نے بتایا کہ:
* آڈٹ رپورٹ کچھ وقفے بعد بھی جمع کرائی جاسکتی ہے،
* اور اگر کاغذات میں کوئی کمی بیشی ہو تو مہاراشٹر اسٹیٹ وقف بورڈ کے ناسک ڈسٹرکٹ آفس سے رجوع کیا جائے۔
نگران افسر شیخ عاصم (ڈسٹرکٹ ناسک وقف بورڈ آفس) کا رابطہ نمبر:9421215659
