محمدیہ انٹرنیشنل اسکول میں یومِ آزادی کی شان دار تقریب
محبتِ وطن کے نغمے، عزم و حوصلے کے چراغ
ہنگولی(صباء فردوس)یومِ آزادی کے پُر مسرت موقع پر محمدیہ انٹرنیشنل انگلش اسکول، ہنگولی کے احاطے میں ایک شاندار اور یادگار تقریب کا انعقاد کیا گیا، جس میں طلبہ و طالبات، اساتذہ اور والدین کی بڑی تعداد شریک ہوئی۔ اسکول کا آنگن صبح سویرے ہی حب الوطنی کے نغموں اور رنگا رنگ
سجاوٹ سے جگمگا اٹھا، جبکہ بچوں کے چہروں پر وطن سے محبت اور جوش و خروش کے رنگ نمایاں تھے۔
تقریب کا آغاز بانیِ ادارہ حاجی شیخ نہال سر کے دستِ مبارک سے پُروقار پرچم کشائی کے ساتھ ہوا۔ اس موقع پر تمام طلبہ و اساتذہ نے نہایت ادب و احترام کے ساتھ راشٹریہ گیت پڑھا، جس سے تقریب کا وقار مزید بڑھ گیا اور ہر دل حب الوطنی کے جذبے سے سرشار ہو گیا۔اس کے بعد رنگا رنگ پروگرام کا آغاز ہوا، جس میں طلبہ نے شاندار پیشکشیں پیش کیں۔ پرجوش تقاریر میں یومِ آزادی کی اہمیت، قربانیوں کی داستانیں اور قومی یکجہتی کے پیغامات کو نہایت اثر انگیز انداز میں بیان کیا گیا۔ سریلی آوازوں میں گائے گئے ملی و حب الوطنی گیت نے ماحول کو گرما دیا۔ بچوں نے Patriotic Action Song کے ذریعے اپنے ولولے کا عملی اظہار کیا۔ مزید برآں، جذبات سے لبریز ڈراموں نے آزادی کی جدوجہد کے تاریخی مناظر کو زندہ کر دیا، جبکہ Patriotic Conversation نے سامعین کو ماضی کی قربانیوں اور حال کے عزم کی یاد دلا دی۔
اساتذہ کی انتھک محنت اور رہنمائی ہر پیشکش میں جھلک رہی تھی، اور بچوں نے بھرپور تیاری اور اعتماد سے ان پروگرامز کو کامیاب بنایا۔ والدین کی بڑی تعداد نے تقریب میں شریک ہو کر اپنے بچوں کی حوصلہ افزائی کی اور اسکول کی اس کاوش کو دل سے سراہا۔پروگرام کے دوران بانیِ ادارہ حاجی شیخ نہال سر نے طلبہ اور والدین سے نہایت پُراثر خطاب کیا۔ انہوں نے یومِ آزادی کی تاریخی اہمیت اور اس کے پیچھے دی جانے والی قربانیوں کا تذکرہ کرتے ہوئے کہا کہ آج کی نسل پر یہ ذمہ داری عائد ہوتی ہے کہ وہ علم، اخلاق اور کردار میں کمال پیدا کرے اور ملک کی تعمیر و ترقی میں اپنا کردار ادا کرے۔ انہوں نے والدین سے درخواست کی کہ وہ بچوں کی تعلیم و تربیت میں اسکول کا بھرپور ساتھ دیں اور بچوں کو مثبت سرگرمیوں میں شامل ہونے کے لیے حوصلہ افزائی کریں۔
پروگرام کے آخر میں حب الوطنی ہفتہ (Patriotic Week) کے دوران منعقد ہونے والے مختلف مقابلوں — جیسے رنگ بھرو، پوسٹر سازی، پیٹریاٹک کارڈ میکنگ، کہانی سنانے، تقریری مقابلہ اور دیگر سرگرمیوں — کے کامیاب طلبہ کو انعامات پیش کیے گئے۔ انعامات کی تقسیم نے بچوں کے چہروں پر خوشی کی چمک پیدا کر دی اور ان کے اندر مزید محنت اور لگن کا جذبہ بیدار کیا۔تقریب کا اختتام ملک کی سلامتی و ترقی کی دعا اور اس عزم کے ساتھ ہوا کہ آئندہ بھی ایسے پروگرامز کا انعقاد کیا جاتا رہے گا، تاکہ طلبہ نہ صرف علمی و تخلیقی میدان میں کامیاب ہوں بلکہ ایک محب وطن، باشعور اور بااعتماد شہری کے طور پر پروان چڑھیں۔
