مظفر نگر میں ماں نے عاشق کی محبت میں دو معصوم بچوں کو زہر دے کر مار ڈالا، پولیس نے ماں کو گرفتار کیا، عاشق مفرور
مظفر نگر، 2١ جون: اترپردیش کے مظفر نگر ضلع کے “رُڑکلی” گاؤں میں جمعرات کو پیش آیا ایک اندوہناک واقعہ، جس نے ماں جیسے مقدس رشتے کو شرمسار کر دیا۔ ایک ماں نے اپنے ہی دو معصوم بچوں کو زہر دے کر اس دنیا سے ہمیشہ کے لیے رخصت کر دیا۔ واقعہ کے بعد علاقے میں سنسنی پھیل گئی ہے، جبکہ پولیس نے ماں کو گرفتار کر کے جیل بھیج دیا ہے، اور اس کے مبینہ عاشق کی تلاش جاری ہے۔
پانچ سالہ ارحان اور ایک سالہ انایہ کی پر اسرار موت
ایس ایس پی سنجے کمار ورما کے مطابق، 19 جون کی دوپہر پولیس کو اطلاع ملی کہ دو چھوٹے بچوں کی مشتبہ حالات میں موت ہو گئی ہے۔ پولیس جب جائے وقوعہ پر پہنچی، تو پانچ سالہ ارحان اور ایک سالہ انایہ مردہ حالت میں پائے گئے۔ بچوں کی ماں “مسکان” گھر پر موجود تھی، جبکہ باپ وسیم روزگار کے سلسلے میں چندی گڑھ میں مقیم تھا۔
ابتدائی پوچھ گچھ کے دوران، مسکان نے بتایا کہ اس نے بچوں کو ناشتہ میں چائے اور بسکٹ دیے، اور پھر سب سو گئے۔ دوپہر کو شوہر وسیم کا فون آیا تو وہ جاگی اور دیکھا کہ دونوں بچے بے ہوش ہیں۔ فوراً وسیم کو اطلاع دی گئی، جس کے بعد اس کا بھائی ڈاکٹر اکرم موقع پر پہنچا، مگر تب تک دونوں بچے دم توڑ چکے تھے۔
پولیس کو موبائل پر شک، پوسٹ مارٹم میں زہر کی تصدیق
پولیس جب گھر پہنچی تو مسکان سے موبائل مانگا گیا، لیکن وہ کوئی واضح جواب نہ دے سکی۔ اس کے بعد پولیس نے کال کرکے موبائل ٹریس کرنے کی کوشش کی، مگر موبائل بند ملا، جس سے شک مزید گہرا ہو گیا۔ بعد ازاں، بچوں کی پوسٹ مارٹم رپورٹ میں ان کے جسم میں زہر کی موجودگی کی تصدیق ہوئی۔
عشق کا جنون یا سنگدلی؟ ماں کا اعتراف جرم
پولیس نے جب مسکان سے سختی سے پوچھ گچھ کی تو اس نے اعتراف کیا کہ اس کے ایک شخص “جنید” سے ناجائز تعلقات تھے۔ دونوں نے بچوں کو مارنے کی سازش تیار کی تھی کیونکہ جنید بچوں کی ذمہ داری اٹھانے کو تیار نہیں تھا۔
مسکان نے بتایا کہ اس کی وسیم سے شادی پانچ سال قبل ہوئی تھی، لیکن وسیم گزشتہ دو سال سے ٹی بی کا مریض ہے اور روزگار سے معذور ہے۔ اسی دوران اس کی جنید سے دوستی ہوئی، جو بعد میں ناجائز تعلقات میں بدل گئی۔ جنید سے شادی کرنے کی ضد میں مسکان نے بچوں کو راستے سے ہٹانے کا منصوبہ بنایا۔
رس گلے میں زہر ملا کر دیے گئے، عاشق جنید فرار
مسکان نے بتایا کہ 19 جون کی صبح اس نے بازار سے لائے گئے رس گلے میں زہر ملا کر بچوں کو کھلا دیے، جس سے دونوں کی موقع پر ہی موت ہو گئی۔ زہر ایک میڈیکل شاپ سے بغیر رسید خریدا گیا تھا، جس کی بھی جانچ جاری ہے۔
پولیس نے ملزمہ کو گرفتار کر کے عدالتی حراست میں جیل بھیج دیا ہے، جبکہ اس کا ساتھی جنید فرار ہے۔ پولیس کی ٹیمیں اسے تلاش کرنے میں مصروف ہیں۔
عوام میں غم و غصہ، واقعہ پر شدید ردعمل
اس افسوسناک واقعہ کے بعد علاقے میں غم اور غصے کی لہر دوڑ گئی ہے۔ مقامی لوگوں نے اس واقعہ کو ماں کے رشتے کو رسوا کرنے والا عمل قرار دیا ہے۔ سوشل میڈیا پر بھی لوگ اس پر سخت ردعمل کا اظہار کر رہے ہیں اور مطالبہ کر رہے ہیں کہ قاتلوں کو سخت ترین سزا دی جائے۔
پولیس کا کہنا ہے کہ جلد ہی جنید کو گرفتار کر کے معاملے کی مکمل حقیقت سامنے لائی جائے گی۔
