ناندیڑ ریلوے اسٹیشن پر مسافر سے موبائل اور نقدرقم کی چوری – دو ملزم گرفتار، ایک فرار

ناندیڑ، 6 جون 2025 – ناندیڑ ریلوے اسٹیشن پر ایک مسافر سے موبائل فون اور نقد رقم چھیننے کا واقعہ پیش آیا ہے۔ پولیس نے فوری کارروائی کرتے ہوئے دو ملزمین کو گرفتار کرلیا ہے جبکہ ایک ملزم فرار ہے۔

متاثرہ شخص محمد عادل (عمر 25 سال، ساکن دیگلور ناکہ، ناندیڑ) نے 6 جون 2025 کو صبح 6:58 بجے لوہمارگ پولیس اسٹیشن (جی آر پی) ناندیڑ میں شکایت درج کروائی کہ وہ 5 جون کی رات تقریباً 10:15 بجے حیدرآباد جانے کے لیے ناندیڑ ریلوے اسٹیشن پر آئے تھے۔ جنرل کوچ میں سوار ہوتے وقت تین نامعلوم افراد نے ان پر حملہ کر کے ان کا موبائل فون اور ₹2,740 روپے نقد زبردستی چھین لیے۔

اس شکایت کی بنیاد پر جی آر پی اور ریلوے پروٹیکشن فورس (آر پی ایف) ناندیڑ نے مشترکہ کارروائی کرتے ہوئے جرم نمبر 300/2025 کے تحت، بھارتی نیائے سنہیتا (BNSS)-2023 کی دفعہ 309 کے مطابق مقدمہ درج کیا اور فوری تحقیقات شروع کی۔

مدعی کی شناخت کی مدد سے دو ملزموں کو گرفتار کر لیا گیا ہے۔ دوران تفتیش ان گرفتار شدہ افراد نے اپنے تیسرے ساتھی کا نام پولیس کو بتایا ہے، جو اس وقت مفرور ہے۔

گرفتار ملزمین سے مزید تفتیش جاری ہے اور فرار ملزم کی تلاش بھی کی جا رہی ہے۔ اس معاملے کی مزید چھان بین جی آر پی ناندیڑ کر رہی ہے۔