ناندیڑ لوک عدالت میں 5,054 مقدمات حل، کروڑوں کے معاملات طے
ناندیڑ، 15 ستمبر: مہاراشٹر اسٹیٹ لیگل سروس اتھارٹی، ممبئی کے احکامات کے تحت ناندیڑ ضلع لیگل سروس اتھارٹی کی جانب سے 13 ستمبر کو ضلع و سیشن کورٹ کے احاطے میں قومی لوک عدالت کا انعقاد کیا گیا۔ اس پروگرام کی صدارت ضلع و سیشن جج و صدر ضلع لیگل سروس اتھارٹی سنیل ویدپاتھک نے کی۔
اس موقع پر ضلع میں مجموعی طور پر 5 ہزار 54 مقدمات باہمی رضامندی سے نمٹائے گئے، جن میں تقریباً 20 کروڑ 24 لاکھ 16 ہزار 512 روپے کی رقم مختلف معاملات میں تصفیے کے طور پر طے پائی۔
تقریب میں ڈاکٹر ایس۔ڈی۔ تاوشیکر، ڈسٹرکٹ جج (درجہ دوم)، شرد دیش پانڈے (سیکریٹری ضلع لیگل سروس اتھارٹی)، رنجیت دیشمکھ (ڈسٹرکٹ گورنمنٹ پلیڈر) سمیت تمام ججز اور وکلاء موجود تھے۔
صدر اجلاس جج سنیل ویدپاتھک نے افتتاحی خطاب میں کہا کہ لوک عدالت انصاف تک آسان رسائی کا ایک مؤثر ذریعہ ہے۔ انہوں نے ایک فلمی مکالمے کا حوالہ دیتے ہوئے کہا: “میرے پاس گاڑی ہے، پیسہ ہے، اچھا وکیل ہے، ثبوت ہیں۔ تمہارے پاس کیا ہے؟” اس پر فریق کو جواب دینا چاہیے: “میرے پاس لوک عدالت ہے۔” اس موقع پر انہوں نے فریقین سے اپیل کی کہ اس موقعے سے فائدہ اٹھا کر اپنے مقدمات جلد از جلد حل کریں۔
سیکریٹری شرد دیش پانڈے نے کہا کہ بعض اوقات سمجھوتے کے ذریعے سکون حاصل کرنا ضروری ہوتا ہے اور لوک عدالت اسی کے لیے ایک بہترین موقع فراہم کرتی ہے۔
ناندیڑ ضلع کے ہر تعلقہ عدالت اور فیملی کورٹ میں اس قومی لوک عدالت کا انعقاد ہوا، جس میں دیوانی، فوجداری، بینک، موٹر وہیکل معاوضہ، زمین حصول، ریلویز، پنچایت و میونسپلٹی کے واجبات، بجلی، ٹیلی کام، ٹریفک جرمانے، فیملی اور لیبر کورٹ کے معاملات شامل تھے۔ خصوصی مہم کے تحت مزید 1184 مقدمات نمٹائے گئے۔
اس موقعے پر ضلع و سیشن جج کی رہنمائی میں ججز اور عدالتی عملے نے نمایاں کردار ادا کیا۔ آخر میں شرد دیش پانڈے نے قومی لوک عدالت کو کامیاب بنانے میں تعاون کرنے والے تمام عدالتی عملے اور افراد کا شکریہ ادا کیا اور آئندہ بھی اسی طرح کے تعاون کی امید ظاہر کی۔
