ناندیڑ-ممبئی وندے بھارت ایکسپریس کا مجوزہ شیڈول جاری!
ناندیڑ، 13 جون 2025: ریلوے بورڈ نے ناندیڑ-ممبئی-ناندیڑ وندے بھارت ایکسپریس کے لیے مجوزہ وقت نامہ جاری کر دیا ہے۔ حتمی منظوری کے بعد، یہ تیز رفتار اور جدید ترین ٹرین جلد ہی ناندیڑ کے مسافروں کی خدمت میں شامل ہو جائے گی۔
ریلوے بورڈ کی تجویز کے مطابق، وندے بھارت ایکسپریس ہفتے میں چھ دن چلے گی۔ ناندیڑ سے یہ ٹرین صبح 5:00 بجے روانہ ہو کر دوپہر 2:25 بجے ممبئی کے چھترپتی شیواجی ٹرمنس پر پہنچے گی، جب کہ ممبئی سے یہ دوپہر 1:10 بجے روانہ ہو کر رات 10:50 بجے ناندیڑ پہنچے گی۔
اس طویل انتظار کے بعد وندے بھارت سروس کے ناندیڑ سے آغاز پر، رکن پارلیمان آشوک راو چوہان نے وزیر اعظم نریندر مودی، ریلوے وزیر اشونی ویشنو، وزیر اعلیٰ دیویندر فڈنویس اور مملکتی وزیر ریلوے رونیـت سنگھ بٹو کا شکریہ ادا کیا۔
آشوک راو چوہان نے اس ٹرین سروس کا کریڈٹ سابق وزیر مملکت برائے ریلوے راو صاحب دانوے کو دیا ہے۔ انہوں نے 2023 میں ناندیڑ-ممبئی وندے بھارت ایکسپریس کا اعلان کیا تھا۔ ان کے دورِ وزارت میں یہ ٹرین ممبئی سے جلنا تک شروع کی گئی تھی۔ جلنا تا ناندیڑ ریلوے لائن کی برقی کاری مکمل ہونے کے بعد، اس ٹرین کا ناندیڑ تک چلایا جانا طے تھا۔ اب جبکہ ریلوے بورڈ نے مکمل شیڈول پیش کر دیا ہے، اس بات کا قوی امکان ہے کہ یہ سروس جلد ہی ناندیڑ سے باقاعدہ طور پر شروع ہو جائے گی۔
