ناندیڑ میونسپل کارپوریشن کی لوک عدالت میں 2 کروڑ 21 لاکھ روپے کا ٹیکس وصول
ناندیڑ – مورخہ 10 مئی 2025 کو ناندیڑ واگھالا شہر میونسپل کارپوریشن اور ضلع لیگل سروس اتھارٹی کے اشتراک سے کارپوریشن کی مرکزی انتظامی عمارت میں قومی لوک عدالت کا انعقاد کیا گیا، جس میں شہریوں کو جائیداد ٹیکس اور پانی ٹیکس سے متعلق شکایات کا ازالہ کرنے اور واجب الادا رقم کی ادائیگی میں سہولت فراہم کی گئی۔
اس لوک عدالت میں معزز پرنسپل ڈسٹرکٹ جج جناب سنیل جی. ویدپاتک، میونسپل کمشنر ڈاکٹر مہیش کمار دوئیفوڑے اور کئی دیگر اعلیٰ افسران و معزز جج حضرات موجود تھے۔ عدالت میں شہریوں کو قانونی امور کی وضاحت کی گئی اور ان کی شکایات کا فوری حل پیش کیا گیا۔
لوک عدالت میں 979 جائیداد مالکان نے ٹیکس میں 80 فیصد جرمانہ معافی اسکیم سے فائدہ اٹھاتے ہوئے ₹2,00,28,760/- (دو کروڑ اٹھائیس ہزار سات سو ساٹھ روپے) مالیت کا جائیداد ٹیکس ادا کیا، جب کہ 170 افراد نے ₹21,64,124/- (اکیس لاکھ چون ہزار ایک سو چوبیس روپے) بطور پانی ٹیکس ادا کیے۔
اس طرح مجموعی طور پر 1149 شہریوں نے جائیداد و پانی ٹیکس کی مد میں ₹2,21,92,884/- (دو کروڑ اکیس لاکھ بانوے ہزار آٹھ سو چوراسی روپے) کی خطیر رقم جمع کرائی، جو میونسپل کارپوریشن کی آمدنی میں قابلِ ذکر اضافہ ہے۔
میونسپل کمشنر ڈاکٹر مہیش کمار دوئیفوڑے نے اُن شہریوں سے اپیل کی جنہوں نے ابھی تک ٹیکس ادا نہیں کیا ہے کہ وہ فوری طور پر واجب الادا ٹیکس جمع کریں، بصورت دیگر انہیں ضبطی، پانی کنکشن منقطع کرنا، نکاسی آب کی بندش، نیلامی جیسی قانونی کارروائیوں کا سامنا کرنا پڑ سکتا ہے۔
یہ لوک عدالت ناندیڑ کے شہریوں کے لیے ایک مثبت اقدام ثابت ہوئی، اور آئندہ ایسی عدالتوں سے فائدہ اٹھانے کی ترغیب بھی دی گئی۔
