ناندیڑ-واگھالا میونسپل کارپوریشن میں کاف ممبر کے عہدے کے لئے شیخ بلال، منا عباس اور محمد ناصر۔
ناندیڑ واگھالا شہر میونسپل کارپوریشن میں کاف ممبر کے عہدے کے لیے سیاسی سرگرمیاں تیز ہو گئی ہیں۔ آج اس عہدے کے لیے مختلف جماعتوں کی جانب سے امیدواروں نے اپنے نامزدگی فارم داخل کیے۔
ذرائع کے مطابق کانگریس اور ونچت بہوجن آغادی کے درمیان اس عہدے کو لے کر ڈھائی ڈھائی سال کے فارمولے پر اتفاق ہوا ہے۔ اس معاہدے کے تحت پہلے مرحلے میں ونچت کی جانب سے ایڈوکیٹ شیخ بلال کاف ممبر کے طور پر ذمہ داری سنبھالیں گے، جبکہ ڈھائی سال مکمل ہونے کے بعد یہ عہدہ کانگریس کے حصے میں آئے گا اور اس کے لیے منّا عباس کا نام طے کیا گیا ہے۔
سیاسی حلقوں میں اس سمجھوتے کو دونوں جماعتوں کے درمیان تال میل کی اہم مثال قرار دیا جا رہا ہے۔ مقامی سطح پر کانگریس اور ونچت کے قائدین کا کہنا ہے کہ اس فیصلے کا مقصد میونسپل کارپوریشن میں بہتر ہم آہنگی کے ساتھ کام کرنا اور شہر کی ترقی کے منصوبوں کو آگے بڑھانا ہے۔
دوسری جانب مجلس اتحادالمسلمین نے بھی اس عہدے کے لیے اپنے امیدوار کا اعلان کیا ہے۔ مجلس کی جانب سے سابق کارپوریٹر محمد ناصر کو کاف ممبر کے لیے نامزد کیا گیا ہے۔ محمد ناصر پہلے بھی کارپوریشن کی سیاست میں سرگرم رہے ہیں اور انہیں مقامی سطح پر ایک تجربہ کار سیاسی رہنما سمجھا جاتا ہے۔
آج تینوں امیدواروں — ایڈوکیٹ شیخ بلال، منّا عباس اور محمد ناصر — نے اپنے نامزدگی فارم داخل کر دیے۔ اس موقع پر مختلف جماعتوں کے کارکنان اور حامی بڑی تعداد میں موجود تھے۔ نامزدگی کے بعد شہر کی سیاسی فضا مزید گرم ہو گئی ہے اور آنے والے دنوں میں اس عہدے کے انتخاب کو لے کر سیاسی سرگرمیوں میں مزید اضافہ ہونے کا امکان ظاہر کیا جا رہا ہے۔
