ناگپور میں فرضی پولیس اہلکاروں کا قہر، 4 وارداتوں میں بزرگ اور خواتین سے لاکھوں کے زیورات لوٹ لیے
ناگپور: مہاراشٹر کے ناگپور شہر میں دھوکہ بازوں نے خود کو پولیس اہلکار ظاہر کر کے چار الگ الگ وارداتوں میں بزرگ شہریوں اور خواتین کو نشانہ بنایا۔ دن دہاڑے پیش آنے والی ان وارداتوں میں ملزمین لاکھوں روپے کے زیورات لے کر فرار ہوگئے، جس کے بعد شہر میں خوف و ہراس کا ماحول ہے۔
شہریوں نے پولیس کی کارکردگی پر سوال اٹھاتے ہوئے کہا ہے کہ مسلسل بڑھتے اس طرح کے واقعات نے عوام کا اعتماد متزلزل کر دیا ہے۔
پہلی واردات اتوار کی صبح تقریباً 10:45 بجے تحصیل تھانہ علاقے میں پیش آئی۔ 55 سالہ ممتا دھاریوال نامی خاتون سے چار نامعلوم افراد نے خود کو پولیس اہلکار ظاہر کرتے ہوئے زیورات کی ’جانچ‘ کے بہانے تقریباً 3 لاکھ 70 ہزار روپے مالیت کے زیورات اتروا لیے۔ یہ واقعہ **اتواری روڈ پر امرکر جیولرز کے سامنے پیش آیا۔ پولیس نے موقع کی سی سی ٹی وی فوٹیج حاصل کرلی ہے۔
دوسری واردات — اسی دن زری پٹکا تھانہ علاقے میں 67 سالہ جگل کشور شاہو نامی بزرگ کے ساتھ دھوکہ ہوا۔ دو ملزمین نے انہیں کاغذ کی پڑیا میں پتھر دے کر تقریباً پانچ لاکھ روپے مالیت کی سونے کی چین ٹھگ لی۔
تیسری واردات دھنتولی تھانہ حدود میں ایک شادی کی تقریب کے دوران پیش آئی۔ مدھیہ پردیش کے کسان اوم پرکاش جیسوال (68) سے جعلی پولیس اہلکاروں نے تقریباً 66 ہزار روپے مالیت کے زیورات لے کر رفوچکر ہوگئے۔
چوتھی واردات ہڈکیشور علاقے میں ہوئی، جہاں 55 سالہ ریٹائرڈ ٹیچر اوشا جھاڑے سے تین افراد نے خود کو پولیس اہلکار ظاہر کرتے ہوئے تقریباًدو لاکھ روپے کے گہنے اتروالیے اور موٹر سائیکل پر فرار ہوگئے۔
پولیس کی کارروائی پولیس کو شبہ ہے کہ چاروں وارداتوں کے پیچھے **ایک ہی گینگ کا ہاتھ ہے۔ پولیس کمشنر رویندر سنگل کے مطابق، امبولی (تھانے ضلع) کا ایک گینگ جون میں بھی اسی طرز کی وارداتیں انجام دے چکا ہے، جن کے دو ملزمین کو اس وقت گرفتار کیا گیا تھا۔ اب پولیس یہ پتہ لگانے میں مصروف ہے کہ کیا وہی گینگ دوبارہ سرگرم ہو گیا ہے۔
