پہلگام حملہ کے بعد سکیورٹی مشاورتیں تیز، وزیر اعظم کی مسلح افواج کے سربراہان سے علیحدہ ملاقاتیں
نئی دہلی، 4 مئی (ایجنسی) جموں و کشمیر کے پہلگام علاقے میں حالیہ دہشت گرد حملے کے بعد ملک کی سکیورٹی صورتحال پر اعلیٰ سطحی مشاورتوں کا سلسلہ تیزی سے جاری ہے۔ وزیر اعظم نریندر مودی نے تینوں افواج کے سربراہان سے علیحدہ علیحدہ ملاقاتیں کی ہیں، جن میں سکیورٹی کی تازہ ترین صورت حال اور ممکنہ ردعمل پر تفصیلی تبادلہ خیال کیا گیا۔
اتوار کے روز ہندوستانی فضائیہ کے سربراہ ایئر چیف مارشل امرپریت سنگھ نے وزیر اعظم سے تقریباً 40 منٹ طویل ملاقات کی۔ اس سے قبل 30 اپریل کو بری فوج کے سربراہ جنرل اوپندر دیویدی اور پھر 3 مئی کو بحریہ کے سربراہ ایڈمرل دنیش تریاٹھی نے وزیر اعظم سے الگ الگ ملاقاتیں کی تھیں۔ ان ملاقاتوں میں وزیر خارجہ ایس جے شنکر اور قومی سلامتی کے مشیر اجیت ڈووال بھی شریک رہے۔
ذرائع کے مطابق، وزیر اعظم نے سکیورٹی اداروں کو مکمل آپریشنل آزادی دیتے ہوئے واضح ہدایات دی ہیں کہ کسی بھی ممکنہ کارروائی کے وقت، طریقہ کار اور ہدف کا فیصلہ افواج خود کریں گی۔ حکومت نے اس مقصد کے لیے تمام انتظامی رکاوٹیں ختم کر دی ہیں تاکہ ایک موثر اور فوری حکمت عملی تیار کی جا سکے۔
یاد رہے کہ 26 اپریل کو وزیر اعظم نے ایک اہم سکیورٹی اجلاس کی صدارت بھی کی تھی، جس میں وزیر دفاع راج ناتھ سنگھ، چیف آف ڈیفنس اسٹاف، تینوں افواج کے سربراہان اور دیگر اعلیٰ حکام شریک تھے۔ اجلاس میں پہلگام حملے کے تناظر میں ممکنہ ردعمل اور سکیورٹی اقدامات کا جائزہ لیا گیا تھا۔
ملک بھر میں دفاعی تیاریوں کو مزید مستحکم کرتے ہوئے آرڈننس فیکٹری بورڈ نے اپنے تمام ملازمین کی چھٹیاں منسوخ کر دی ہیں، جسے دفاعی تیاریوں میں تیزی لانے کا واضح اشارہ سمجھا جا رہا ہے۔ اگرچہ بعض ذرائع ان اقدامات کو ممکنہ کارروائی کی تمہید کے طور پر دیکھ رہے ہیں، لیکن سرکاری طور پر فی الحال کوئی عسکری کارروائی یا مداخلت کا اعلان نہیں کیا گیا ہے۔
حکومت کا مؤقف واضح ہے کہ دہشت گردی کے خلاف زیرو ٹالرنس کی پالیسی جاری رہے گی، اور پہلگام حملے میں ملوث عناصر کو کیفر کردار تک پہنچایا جائے گا۔ موجودہ اقدامات کو داخلی سلامتی کے تناظر میں احتیاطی اور فیصلہ کن حکمت عملی کا حصہ قرار دیا جا رہا ہے۔
