چکھلی میں یوتھ کانگریس کے صدر کی جانب سے بیوی کو زندہ جلانے کی کوشش، شہر میں سنسنی
بلڈانہ ،10؍نومبر(محمد راغب دیشمکھ کی خصوصی رپورٹ) مہاراشٹر کے ضلع بلڈانہ کے چکھلی شہر میں ایک دل دہلا دینے والا واقعہ پیش آیا ہے، جہاں شہر کی یوتھ کانگریس کے صدر وِشال عرف رِکی کاکڑے نے اپنی بیوی پر پیٹرول ڈال کر آگ لگانے کی کوشش کی۔ یہ واقعہ میاں بیوی کے درمیان غیر اخلاقی تعلقات کے شبہ سے شروع ہونے والے جھگڑے کے دوران پیش آیا۔ خوش قسمتی سے بیوی نَمیتا کاکڑے نے بروقت ہوش مندی دکھاتے ہوئے اپنی ساڑی پانی سے بھگو کر جان بچا لی۔پولیس کے مطابق، نَمیتا وشال کاکڑے (عمر 29 سال) نے اس واقعے کی شکایت چکھلی شہر پولیس اسٹیشن میں درج کرائی ہے۔
شکایت میں کہا گیا ہے کہ 9 نومبر کی شب آٹھ بجے سے ساڑھے گیارہ بجے کے درمیان وشال کی والدہ ریکھا کاکڑے اور بہن بھاونا نکوال نے وشال کو بیوی کو جان سے مارنے کے لیے اکسانے کی بات کہی۔ اسی دوران غصے میں آکر وشال نے گھر میں رکھی پلاسٹک کی بوتل سے بیوی کے جسم پر پیٹرول ڈالا، گیس جلائی اور اسے آگ لگانے کی کوشش کی۔ تاہم نَمیتا نے حاضر دماغی سے آگ بجھائی اور خود کو بچا لیا۔ بعد ازاں وہ فوراً پولیس اسٹیشن پہنچ گئیں اور شکایت درج کرائی۔
پولیس نے وشال عرف رِکی کاکڑے، اس کی والدہ ریکھا کاکڑے اور بہن بھاونا نکوال کے خلاف مختلف دفعات کے تحت مقدمہ درج کر کے تفتیش شروع کر دی ہے۔ اطلاعات کے مطابق، وشال اور نَمیتا کی شادی 2020 میں ہوئی تھی۔ شادی کے ابتدائی چند مہینوں تک تعلقات ٹھیک رہے، لیکن بعد میں سسرال والوں کی جانب سے نَمیتا پر ظلم و زیادتی شروع ہو گئی۔ ساس ریکھا کاکڑے اور نند بھاونا نکوال اکثر اسے طعنے دیتیں اور مارپیٹ بھی کرتیں۔
نَمیتا پچھلے دو ماہ سے بلدیہ میں صفائی ملازمہ کے طور پر کام کر رہی تھیں۔ انہیں اپنے شوہر کے کردار پر شک تھا اور ان کے فون میں دیگر خواتین کے پیغامات دیکھنے کے بعد جھگڑے بڑھ گئے۔ اتوار کو اسی بات پر دونوں میں تکرار ہوئی۔ دورانِ جھگڑا وشال کے فون پر ایک خاتون کا کال آیا جس پر بیوی نے سوال کیا، تو وہ برہم ہو گیا۔ اسی غصے میں اس نے بیوی کو بیڈ روم میں لے جا کر اس کے جسم پر پیٹرول ڈالا اور آگ لگانے کی کوشش کی۔
واقعے کے بعد نَمیتا کے والدین بھی پولیس اسٹیشن پہنچے اور اپنی بیٹی کے ساتھ پیش آنے والی زیادتیوں کی تفصیلات میڈیا کے سامنے بیان کیں۔ فی الحال چکھلی پولیس نے وشال کو حراست میں لے کر مزید تفتیش شروع کر دی ہے۔ اس المناک واقعے نے پورے چکھلی شہر میں سنسنی پھیلا دی ہے۔
