کوزیکوڈ میں سڑک حادثہ: پرینکا گاندھی نے قافلہ رکوایا، زخمیوں کو فوری طبی امداد فراہم کی

کوزیکوڈ، 4 مئی (ایجنسی) کانگریس کی سینئر رہنما اور رکن پارلیمان پرینکا گاندھی واڈرا نے انسانیت نوازی کی ایک مثال قائم کرتے ہوئے ہفتہ کی رات کو کیرالہ کے ضلع کوزیکوڈ میں پیش آئے ایک سڑک حادثہ کے متاثرین کی فوری مدد کی۔ حادثہ اُس وقت پیش آیا جب کولیانڈی کے رہائشی نوشاد اور ان کے اہلِ خانہ کی کار ایک دوسری گاڑی سے ٹکرا گئی۔

حادثے کے وقت پرینکا گاندھی کا قافلہ اِنگپوجھا علاقے سے گزر رہا تھا۔ جیسے ہی انہوں نے زخمیوں کو سڑک پر دیکھا، فوراً اپنی گاڑی رکوا دی اور موقع پر پہنچ کر حالات کا جائزہ لیا۔ انہوں نے اپنے ساتھ موجود ڈاکٹروں کو فوری طلب کیا اور زخمی افراد کو ابتدائی طبی امداد فراہم کروائی۔ بعد ازاں، زخمیوں کو ایمبولینس کے ذریعے اسپتال منتقل کرنے کی ہدایت دی۔

کانگریس پارٹی کی جانب سے سوشل میڈیا پر شیئر کی گئی ویڈیو میں دیکھا جا سکتا ہے کہ پرینکا گاندھی نہ صرف زخمیوں سے بات چیت کر رہی تھیں بلکہ ان کا حوصلہ بھی بڑھا رہی تھیں۔ انہوں نے موقع پر موجود افراد سے واقعہ کی تفصیلات حاصل کیں اور ڈاکٹروں کو زخمیوں کو مکمل طبی سہولتیں فراہم کرنے کی تاکید کی۔

یاد رہے کہ پرینکا گاندھی ان دنوں اپنے بھائی راہول گاندھی کے حلقہ وائناڈ کے تین روزہ دورے پر کیرالہ میں موجود ہیں۔ اس دوران وہ مختلف علاقوں کا دورہ کر رہی ہیں اور عوام سے ملاقاتیں کر رہی ہیں۔

گوا بھگدڑ واقعہ پر گہرے رنج و غم کا اظہار

اسی روز پرینکا گاندھی نے گوا کے شیر گاؤں میں لیرائی دیوی مندر کی سالانہ یاترا کے دوران بھگدڑ میں 6 عقیدت مندوں کی ہلاکت پر بھی گہرے دکھ کا اظہار کیا۔ انہوں نے اپنے سوشل میڈیا پیغام میں کہا:

"گوا کے شیر گاؤں میں لیرائی دیوی مندر کی یاترا کے دوران بھگدڑ میں کئی عقیدت مندوں کی موت اور دیگر کے زخمی ہونے کی خبر دل دہلا دینے والی ہے۔ میں تمام سوگوار خاندانوں کے ساتھ اپنی گہری ہمدردی کا اظہار کرتی ہوں۔”