یومِ آزادی کے موقع پر عبدالحمید خان غضنفرؔ کی کتاب

ناندیڑ: 16 اگست (نامہ نگار) 15؍اگست کو یومِ آزادی کے پْرمسرت موقع پر ضلع پریشد اردو پرائمری اسکول، جولہ پنچال، تعلقہ کلمنوری، ضلع ہنگولی میں ایک باوقار اور یادگار تقریب کا انعقاد کیا گیا، جس میں جناب عبدالحمید خان غضنفرؔ کی پی ڈی ایف شکل میں مرتب کردہ گراں قدر تصنیف ’’500تحریکی اقوالِ زرّین و 100 اشعار ، انقلابی سوچ، تڑپ و عمل‘‘ کا رسمِ اجراء صدر مدرس عالی جناب محمد عامر کے ہاتھوں عمل میں آیا۔تقریب میں اسکول کے معزز اساتذہ کرام عبدالبشیر خان، عبدالرحمن فاروقی، اسلم معراج، سید نور بابو، عائشہ جبین، سلمیٰ بیگم، شیخ رفیق، اکبر خان پٹھان اور وسیم قریشی موجود تھے۔اس موقع پر اساتذہ کرام اور طلبہ و طالبات نے عبدالحمید خان غضنفرؔکی اس علمی و تحریکی کاوش کی بھرپور ستائش کی اور انھیں مبارک باد پیش کی۔

حاضرین نے اس بات کا اعتراف کیا کہ یہ کتاب طلبہ و طالبات میں تعلیم کے تئیں انقلابی تبدیلی لاسکتی ہے، نیز اساتذہ کرام کے لیے مشعل راہ ثابت ہوگی۔ واضح رہے کہ موصوف اس سے قبل بھی چار اہم تصانیف ’’125 تعمیری، اصلاحی و تحریکی اقوالِ زرّین‘‘ (حصہ اوّل و دوم)، ’’500تحریکی، پسندیدہ اشعار‘‘ اور ’’اقوالِ زرّین،شکوے شکایتوں کا آئینہ‘‘ شائع کرچکے ہیں جو علمی حلقوں میں پذیرائی حاصل کرچکی ہیں۔ ان کا آن لائن ’’ اعتبار نیوز پورٹل‘‘ پر مستقل کالم ’’ تحریک طالب علم‘‘ میں تحریکی شخصیات، پسندیدہ اشعار، جنرل نالج، لطائف و اقوال زرّین ہر اتوار کو شائع ہوتے رہتے ہیں۔ اس کے علاوہ اِن کے مضامین ملک کے ممتازرسائل و اخبارات جیسے روزنامہ تہلکہ ٹائمز ناندیڑ، روزنامہ منصف حیدرآباد، ماہنامہ سائنس نئی دہلی، ماہنامہ اْمنگ دہلی، میں بھی شائع ہوچکے ہیں۔