پیڑ لگاؤ زمین میں حکم ہے یہ دین میں ذاکر نگر نیو فرینڈس کالونی کے پارک میں سی آئی او کی شجر کاری مہم
ملک گیر شجر کاری مہم کے تحت سی آئی او ذاکر نگر یونٹ، دہلی کی جانب سے، ذاکر نگر اور نیو فرینڈس کالونی کے درمیان واقع ایم سی ڈی پارک میں شجر کاری کا ایک بڑاپروگرام منعقد کیا گیا۔شعبہ خواتین کی نگرانی میں سی آئی او کے بچے، جن کی تعداد چالیس سے پچاس کے درمیان تھی جماعت اسلامی کے مقامی دفتر ، نزد مسجد التقویٰ سے پیدل مارچ کرتے ہوئے پورا ذاکر نگر پار کر کے نیو فرینڈس کالونی میں پارک تک پہنچے۔ایس آئی او کے نوجوان آگے آگے ان بچوں کے لئے راستہ بنا رہے تھے۔بچوں نے اپنے ہاتھوں میں ماحولیاتی شعور بیدار کرنے والے پلے کارڈز اٹھارکھے تھےاورجوشیلے نعرے لگا رہے تھے۔سفید مخصوص یونیفارم میں بچوں کی زبان سے ’’ پیڑ لگاؤماحول بچاؤ‘‘، ’’مٹی میں ہاتھ دل وطن کے ساتھ‘‘ ،’’پیڑ لگاؤ زمین میں حکم ہے یہ دین میں‘‘ جیسے نعروں نے ہر گزرنے والے کی توجہ اپنی طرف مبذول کر لی۔
اس پروگرام میں جماعت اسلامی ہند کی دعوت پر کئی معزز مہمانوں نے شرکت کی۔سدبھاونا گروپ این ایف سی ذاکر نگر کے چیئر مین ڈاکٹر نیرج بھلا نے بچوں کی حوصلہ افزائی کی ، ماحولیات کے تحفظ کے لئے ان کی پہل کو سراہا اور مستقبل کے معمار کی حیثیت سے ان پر اپنے اعتماد کا اظہار کیا۔سوشل ورکر محترمہ کرن سرین، جناب یوسف محمد اور ایف ایف سی آر ڈبلیو کے صدر جناب آصف کمال نے بھی بچوں کی کوششوں کو سراہااور کہا کہ پودے لگا دینا ہی کا فی نہیں ہے ، ہمیں ان کی حفاظت کی ذمہ داری بھی لینی ہوگی۔
