عوامی اپیل: قیمتیں کم کرو، ورنہ احتجاج قریشی برادری کے خلاف ہوگا

ریاست بھر میں حال ہی میں قریشی برادری نے گوراشاکوں کی زیادتیوں کے خلاف بھرپور احتجاج کیا تھا۔ اس احتجاج میں عوام نے بھی بڑھ چڑھ کر قریشی برادری کا ساتھ دیا اور ان کے حق میں آواز بلند کی۔ مطالبات کی منظوری کے بعد گوشت کی دکانیں دوبارہ کھل گئیں جس سے عوام کو یہ توقع تھی کہ اب صورتحال بہتر ہوگی۔ مگر عوامی توقعات کے برعکس گوشت کی قیمتوں میں اچانک اضافہ کر دیا گیا جس سے عوام میں شدید غم و غصہ پایا جا رہا ہے۔

گوراشاکوں کے خلاف احتجاج تھا، قیمتوں کے لیے نہیں*

عوامی نمائندوں کا کہنا ہے کہ قریشی برادری نے جو احتجاج کیا تھا وہ محض گوراشاکوں کی زیادتیوں اور دباؤ کے خلاف تھا، اس کا مقصد گوشت کی قیمتوں میں اضافہ ہرگز نہیں تھا۔ مگر اب عوامی تاثر یہ ہے کہ قریشی برادری نے احتجاج کے بعد اپنے ہی فائدے کے لیے قیمتوں میں اضافہ کر دیا ہے جس سے براہِ راست غریب اور متوسط طبقہ متاثر ہو رہا ہے۔

غریب عوام کی پہنچ سے گوشت دور*

مہنگائی کے اس نئے وار نے عوام کی کمر توڑ دی ہے۔ غریب اور نادار طبقہ جو پہلے ہی مشکلات سے دوچار ہے، اب گوشت خریدنے کے قابل ہی نہیں رہا۔ دیہاڑی دار مزدوروں کا کہنا ہے کہ "ہم نے قریشی برادری کا ساتھ گوراشاکوں کے مظالم کے خلاف دیا تھا، لیکن آج انہی قصابوں نے قیمتیں بڑھا کر ہمیں ایک نئی مصیبت میں ڈال دیا ہے۔”

عوام کا انتباہ اور اجتماعی اپیل*

اس صورتحال پر عوام نے اجتماعی طور پر ایک بورڈ پر تحریری اپیل درج کر کے قریشی برادری کو واضح پیغام دیا ہے کہ وہ فی الفور گوشت کی قیمتوں میں کمی کریں۔ عوامی نمائندوں نے کہا ہے کہ "اگر قیمتوں کو کم نہ کیا گیا تو ہمیں قریشی برادری کے خلاف براہِ راست احتجاج کرنا پڑے گا۔” شہریوں کا دو ٹوک کہنا ہے کہ قصاب حضرات اپنی روزی انہی عوام کی بدولت کماتے ہیں، لہٰذا انہیں عوامی مشکلات کو سمجھتے ہوئے منافع خوری کے بجائے انصاف کا راستہ اختیار کرنا چاہئے۔

انتظامیہ کی ذمہ داری*

عوامی حلقوں نے حکومت اور انتظامیہ سے فوری مداخلت کا مطالبہ کیا ہے تاکہ سرکاری نرخوں پر سختی سے عملدرآمد کرایا جائے۔ بصورتِ دیگر، عوامی احتجاج مزید شدت اختیار کرے گا اور اس کی ذمہ داری نہ صرف قریشی برادری بلکہ انتظامیہ پر بھی عائد ہوگی۔

عوام کا دو ٹوک پیغام یہ ہے کہ قریشی برادری قیمتوں میں کمی کرے، ورنہ اب احتجاج انہی کے خلاف ہوگا۔