گجرات اے ٹی ایس کا بڑا دعویٰ: داعش سے مبینہ روابط رکھنے والے تین مشتبہ افراد گرفتار، بڑی دہشت گرد کارروائی ناکام

احمدآباد (نمائندہ خصوصی) —گجرات اینٹی ٹیررزم اسکواڈ (ATS) نے دعویٰ کیا ہے کہ اس نے ملک میں ممکنہ دہشت گرد حملے کی سازش ناکامبناتے ہوئے تین مشتبہ افراد کو گرفتار کیا ہے جن کے مبینہ روابط بین الاقوامی شدت پسند تنظیم داعش (ISIS) سے پائے گئے ہیں۔

اے ٹی ایس حکام کے مطابق گرفتار ملزمان کی شناخت ڈاکٹر احمد محی الدین سید ولد عبدالقادر جیلانی، محمد سہیل ولد محمد سلیمان، اور آزاد ولد سلیمان سیفی کے طور پر کی گئی ہے۔
تحقیقات سے معلوم ہوا ہے کہ ان میں سے دو افراد اتر پردیش سے جبکہ ایک آندھرا پردیش کا رہائشی ہے۔

کارروائی کے دوران پولیس نے ان کے قبضے سے دو گلاک پستول، ایک بیریٹا پستول، 30 زندہ کارتوس، اور تقریباً چار لیٹر ارنڈی کا تیل برآمد کیا ہے۔ حکام کا کہنا ہے کہ یہ اسلحہ ممکنہ دہشت گرد کارروائیوں میں استعمال کیا جانا تھا۔

اے ٹی ایس ذرائع کے مطابق، ان تینوں افراد پر ہتھیاروں کی ترسیل، غیر قانونی سرگرمیوں میں ملوث ہونے، اور شدت پسند تنظیموں کے ساتھ روابط کے الزامات ہیں۔
تحقیقات میں یہ بھی سامنے آیا ہے کہ ان پر گزشتہ ایک سال سے خفیہ نگرانی جاری تھی، اور شبہ ہے کہ وہ ملک کے مختلف حصوں میں حملوں کی منصوبہ بندی کر رہے تھے۔

حکام نے بتایا کہ گرفتار شدگان گجرات میں ہتھیاروں کی فراہمی کے لیے پہنچے تھے، اور تینوں کا تعلق دو مختلف دہشت گرد ماڈیولز سے بتایا جا رہا ہے۔
پولیس نے مزید کہا کہ ان کے بین الاقوامی رابطوں اور مالی ذرائع کے حوالے سے تفصیلی تحقیقات جاری ہیں۔