25 دسمبر سے ممبئی–ناند یڑ –ممبئی فضائی سروس شروع؛ مرہٹواڑہ کے لیے بڑی راحت کی خبر
مرہٹواڑہ کے ناند یڑ، ہنگولی، پربھنی، لاتور، واشیم اور قریبی اضلاع کے لاکھوں مسافروں کا طویل انتظار آخر کار ختم ہوا۔ کئی برسوں سے زیرِ التوا ممبئی–ناند یڑ–ممبئی فضائی سروس کو 25 دسمبر سے باقاعدہ شروع کرنے کا سرکاری اعلان کیا گیا ہے۔ اسٹار ایئر کی آفیشل ویب سائٹ پر ٹکٹوں کی بُکنگ بھی شروع ہوچکی ہے۔ ابتدائی مرحلے میں یہ سروس ہفتے میں تین دن—منگل، جمعرات اور ہفتہ—کو دستیاب رہے گی۔
تکنیکی وجوہات سے تاخیر، مگر اب تمام تیاریاں مکمل
یہ فضائی سروس نومبر میں ہی شروع ہونے والی تھی، مگر ایئر لائن کی تیاریوں میں کچھ تکنیکی پہلوؤں کے ادھورے رہ جانے کی وجہ سے افتتاح میں تاخیر ہوئی۔ اب تمام تکنیکی کارروائیاں پوری ہونے کے بعد 25 دسمبر سے پروازیں شروع کرنے کا فیصلہ قطعی ہوچکا ہے۔
اسٹار ایئر نے نانदेڑ ایئرپورٹ پر عملہ، گراؤنڈ اسٹاف، سکیورٹی اور دیگر سہولیات کی پوری تیاری مکمل کر لی ہے۔
مرہٹواڑہ کی ترقی میں اہم سنگ میل
ممبئی تا ناند یڑ سروس مرہٹواڑہ کی ترقی کے لیے نہایت اہم قدم ثابت ہوگی۔ تجارت، تعلیم، طبّی ضروریات، سیاحت اور سرکاری کاموں کے لیے ممبئی کے بار بار کے سفر کرنے والے لوگوں کو بڑی سہولت ملے گی۔فضائی سروس شروع ہونے سے ناند یڑ–ممبئی کا سفر صرف ایک گھنٹے میں طے ہوسکے گا، جب کہ پہلے یہ سفر سڑک کے ذریعے 12 سے 14 گھنٹے تک کا ہوتا تھا۔
اعلیٰ سطحی کوششوں سے سروس بحال
اس سروس کو دوبارہ شروع کرنے کے لیے ریاستی اور مرکزی سطح پر مسلسل کوششیں کی گئیں۔اس میں وزیرِ اعلیٰ دیویندر فڈنویس، مرکزی وزیر برائے شہری ہوا بازی کے۔ رام موہن نائیڈو اور مرکزی وزیرِ مملکت مُرلی دھر موہول کا خصوصی تعاون شامل رہا۔
انتظامیہ کی جانب سے اسٹار ایئر کو ضروری اجازت نامے، سہولیات اور تکنیکی مدد فوراً مہیا کرائی گئی۔
جلد ہی روزانہ سروس کا امکان
فی الحال ہفتے میں تین دن پروازیں چلیں گی، لیکن مسافروں کی بڑھتی ہوئی طلب کو دیکھتے ہوئے اسٹار ایئر نے چند ہفتوں میں روزانہ سروس شروع کرنے کی تیاری ظاہر کی ہے۔
ایئرپورٹ پر اس کے لیے ضروری انفراسٹرکچر تیار کرنے کا کام بھی جاری ہے۔
مقامی سطح پر زبردست خوشی کا ماحول
سروس کے آغاز کا اعلان ہوتے ہی ناند یڑ شہر اور مرہٹواڑہ کے مختلف علاقوں میں خوشی کی لہر دوڑ گئی۔تاجر تنظیموں، تعلیمی اداروں، صنعت کاروں اور میڈیکل کالجوں نے اس فیصلے کا خیر مقدم کیا ہے۔ ماہرین کا ماننا ہے کہ اس سے خطے کی معاشی سرگرمیوں میں تیزی آئے گی۔
