’آپریشن سندور‘: ہندوستان کی جوابی کارروائی، دہشت گرد ٹھکانوں پر تباہ کن حملے – فوج اور وزارت خارجہ کی مشترکہ پریس بریفنگ
نئی دہلی، 7مئی 2025: جموں و کشمیر کے پہلگام میں ہوئے دہشت گردانہ حملے کے جواب میں ہندوستان نے ’آپریشن سندور‘ کے تحت پاکستان کے اندر واقع دہشت گردی کے ڈھانچے کو براہ راست نشانہ بناتے ہوئے 9 ٹھکانوں پر فضائی حملے کیے۔ اس کارروائی میں ہندوستانی فوج، فضائیہ اور بحریہ نے مشترکہ طور پر حصہ لیا، جس کے نتیجے میں تقریباً 90 دہشت گرد مارے جانے کی اطلاع ہے۔
وزارت خارجہ اور فوج کی اہم پریس بریفنگ میں واضح کیا گیا کہ یہ کارروائی مکمل انٹیلی جنس معلومات کی بنیاد پر کی گئی اور اس کا مقصد صرف دہشت گردوں کو نشانہ بنانا تھا۔
اہم نکات:
خارجہ سکریٹری وکرم مسری نے کہا کہ پہلگام حملہ کشمیر میں امن کو متاثر کرنے کی کوشش تھی، جس کا مقصد فرقہ وارانہ کشیدگی پھیلانا تھا۔
انہوں نے واضح کیا:
"ہندوستان نے اپنی سرزمین پر حملوں کا جواب دینے اور ایسی کوششوں کو روکنے کے اپنے حق کا استعمال کیا ہے۔ ہماری کارروائی نپی تلی، ذمہ دارانہ اور غیر اشتعالی تھی۔”
وِنگ کمانڈر ویومیکا سنگھ کے مطابق،
"مظفرآباد، برنالہ اور سیالکوٹ کے لشکرِ طیبہ کیمپوں کو نشانہ بنایا گیا، کارروائی سے پہلے ٹھوس انٹیلی جنس رپورٹیں موصول ہو چکی تھیں۔”
کرنل صوفیہ قریشی نے کہا کہ:
"آپریشن سندور معصوم سیاحوں اور ان کے اہل خانہ کو انصاف دلانے کے لیے شروع کیا گیا۔ پاکستان تین دہائیوں سے دہشت گردی کے انفراسٹرکچر کی تعمیر میں مصروف ہے۔”
انہوں نے مزید بتایا کہ کارروائی میں شمالی سَوا نالہ سے لے کر جنوبی بہاولپور تک کے متعدد اہم دہشت گرد کیمپ تباہ کیے گئے، تاکہ ان تنظیموں کی کمر توڑی جا سکے جو ہندوستان کے خلاف سازشوں میں ملوث ہیں۔
بین الاقوامی ردعمل کی تیاری:
ذرائع کے مطابق ہندوستان نے اس کارروائی کے فوراً بعد بین الاقوامی سفارتی رابطے تیز کر دیے ہیں تاکہ پاکستان پر عالمی دباؤ ڈالا جا سکے کہ وہ اپنی سرزمین سے دہشت گردی کا انفراسٹرکچر مکمل طور پر ختم کرے۔
