حیدر پٹرول پمپ کے ملازم کی بڑی خیانت – 2 لاکھ 70 ہزار روپے غائب
ناندید (نمائندہ): شہر کے حیدر باغ نمبر ایک علاقے میں واقع پٹرول پمپ پر کام کرنے والے ایک ملازم نے مالک کا بھروسہ توڑتے ہوئے تقریباً دو لاکھ ستر ہزار روپے نقد رقم چرا لی۔ یہ واقعہ 25 اگست کو بے نقاب ہوا۔
محمد سلیم احمد حسین کی جانب سے اتوارہ پولیس اسٹیشن میں درج شکایت کے مطابق، شیخ صاحب شیخ عظیم (ساکن لکشمی نگر) اس پٹرول پمپ پر ملازم تھا۔ اس نے معمول کے مطابق پٹرول اور ڈیزل فروخت کیا، لیکن روزانہ کی فروخت کی رقم جمع کرانے کے بجائے سیدھا دفتر میں رکھی گئی دو لاکھ ستر ہزار روپے نقدی اٹھا کر فرار ہوگیا۔
اس واقعہ کے بعد پولیس نے فوری کارروائی کرتے ہوئے مقدمہ نمبر 280/2025درج کیا ہے۔ اتوارہ پولیس انسپکٹر واجد کی نگرانی میں مزید تفتیش جاری ہے۔
اس واردات کے بعد علاقے میں کھلبلی مچ گئی ہے اور تاجر برادری میں یہ بحث زوروں پر ہے کہ “بھروسے کے قابل سمجھے جانے والے ملازم پر بھی کڑی نظر رکھنا ضروری ہے۔” پولیس نے مفرور ملزم کی تلاش کے لیے خصوصی ٹیم تشکیل دی ہے اور جلد ہی اس کی گرفتاری کا یقین دلایا جا رہا ہے۔
