ایک مثالی مشفق و مہربان قائم مقام والد، بھائی کی یاد میں

دنیا میں چند ہستیاں ایسی ہوتی ہیں جن کی زندگی خود نمونہ اور جن کی موت نصیحت بن جاتی ہے۔ ان کے وجود میں محبت، خلوص، خدمت، اور قربانی کا گلدستہ جمع ہوتا ہے۔ انہی تابندہ شخصیات میں سے ایک روشن چراغ میرے بڑے بھائی عبدالقدوس تھے۔

اللہ تعالیٰ نے انہیں حسنِ ظاہر کے ساتھ حسنِ باطن کی دولت سے بھی نوازا تھا۔ گورا رنگ، کھڑی ناک، ابھرے گال، چھوٹے لب، مسکراتا چہرہ، آنکھوں میں نور کی سی چمک، پھرتیلی چال اور بلند مگر خوش آہنگ آواز—ان تمام خوبیوں کے ساتھ آپ کی شخصیت ایک دلکش منظر پیش کرتی تھی۔ مگر ان سب کے باوجود آپ کا اصل حسن آپ کی محبت، انسان دوستی، نرم دلی اور اخلاص تھا۔

خاندان کا مرکز و محور
آپ والدین کے محبوب، نانا نانی کے چہیتے، ماموؤں کے قریب ترین بھانجے، پھوپھوؤں کے نازوں کے بھتیجے تھے۔ خاندان میں آپ کی تکریم اور عزت بے مثال تھی۔
آپ نہ صرف بڑوں کا احترام کرتے بلکہ چھوٹوں پر بے پناہ شفقت فرماتے۔ آپ کی گفتگو میں نرمی، لہجے میں اپنائیت اور آنکھوں میں محبت کی چمک ہوا کرتی تھی۔

بھائیوں، بھتیجوں اور بھتیجیوں سے شفقت و محبت
آپ کے دل میں اپنے بھائیوں اور ان کی اولاد کے لیے خاص محبت تھی۔
بھائیوں کے ساتھ تعلق میں محبت، خدمت، تعاون اور خیرخواہی جھلکتی تھی۔ مشکل ہو یا آسانی، تکلیف ہو یا خوشی، ہر موقع پر آپ سب سے بڑھ کر کھڑے ہوتے۔
آپ اپنے بھتیجوں اور بھتیجیوں کے لیے ہمیشہ خوشی و مسکراہٹ کا سبب تھے۔
ان کی تعلیم، تربیت، ضرورت اور مسائل کا خیال رکھتے۔
ان میں سے کسی کو بیماری ہو، غم آئے یا کوئی مسئلہ درپیش ہو، تو آپ اپنی مصروفیات چھوڑ کر ان کا سہارا بنتے اور دلجوئی فرماتے۔
آپ کا رویہ ان کے لیے باپ جیسا شفقت بھرا تھا۔

ہر فرد اس بات کا گواہ ہے کہ
آپ کی صحبت میں محبت، نصیحت اور دعائیں ہوا کرتی تھیں، شکایت یا کڑواہٹ نہیں۔
یہی وجہ تھی کہ خاندان کے چھوٹے بڑے سب آپ کو نہ صرف پسند کرتے بلکہ دل سے چاہتے تھے۔

تعلیم اور فہم
تعلیم میں اللہ تعالیٰ نے آپ کو صلاحیت عطا فرمائی تھی۔ میٹرک اور بارہویں دونوں میں نمایاں نمبرات حاصل کیے۔ تجارت کی دلچسپی کے باعث B.Com میں داخلہ لیا مگر گھر کے ماحول کے باعث تعلیم جاری نہ رکھ سکے۔ ملازمت کے مواقع آئے مگر خاندان کی محبت اور نانا کے منع کی وجہ سے باہر نہ گئے۔ اور آپ نے کبھی اس صورتِ حال کو شکوہ نہیں بنایا—یہ قناعت اور شکر گزاری کا روشن نمونہ تھا۔

تجارت و روزگار
کپڑے کے کاروبار میں کم عمری سے قدم رکھا۔ مختلف تاجروں کے ساتھ ملازمت کی مگر محنت، دیانت اور اخلاق کی وجہ سے سب نے آپ کو ملازم نہیں بلکہ شریکِ کار سمجھا۔ آپ نے بھی کو اپنا سمجھ کر کام کیا۔

سماجی خدمات اور سیاست
آپ مسلم لیگ اور جنتا دل جیسے پلیٹ فارمز پر سرگرم رہے۔ کارپوریٹر کے انتخابات میں بھی حصہ لیا۔
لوگوں کی خدمت، ان کے کام آنا، خوشی غم میں شریک ہونا—یہ آپ کی زندگی کا مرکزی پہلو تھا۔
کسی کی شادی ہو، کسی کی ضرورت، کسی کی مجبوری—آپ سب سے آگے رہتے۔

خاندان کی ذمہ داریاں
شادی کے بعد آپ کے خسر کا انتقال ہوگیا، مگر آپ نے سالیوں اور سالوں کی سرپرستی باوقار انداز میں کی۔ ان کی شادیاں، تقریبات، ہر مرحلہ اپنی ذمہ داری سے ادا کیا۔

دین سے وابستگی
آپ نماز کے پابند تھے، قرآن کی تلاوت آپ کے رنگ میں رچی ہوئی تھی۔ کئی برس تک مفتی وقایت اللہ صاحب کے پیچھے تراویح ادا کی۔
رحمت نگر مسجد معراج کے انتظامات میں نمایاں کردار ادا کیا۔
کئی سال فجر کی اذان دی اور مسجد کی تعمیر و ترقی میں حصہ لیا۔

اولاد کی پرورش
اللہ نے چھ بیٹیاں اور دو بیٹے عطا کیے۔ آپ نے بہترین تربیت اور محبت بھری کفالت کی۔
شادیوں اور تمام ذمہ داریوں کو احسن طریقے سے نبھایا۔ کبھی کسی کے سامنے ہاتھ نہیں پھیلایا—یہ غیرت، خودداری اور قناعت کا اعلیٰ نمونہ تھا۔

حج کی سعادت
حرمین شریفین جانے کی خواہش مدتوں سے دل میں تھی۔
اللہ تعالیٰ نے 2024 میں یہ تمنّا پوری فرمائی۔ یقیناً یہ قبولیت کی دلیل ہے۔

وصال اور خلا
آج وہ ہمارے درمیان نہیں۔ مگر ان کی محبت، تربیت، خلوص، خدمت اور دعائیں ہمارے دلوں میں زندہ ہیں۔
ان کی جدائی نے ایسا خلا چھوڑا ہے جس کی تکمیل ممکن نہیں۔
لیکن ہمیں یقین ہے کہ وہ ایک کامیاب و باعزت زندگی گزار کر گئے اور جنتی ہیں۔

دعا
اے اللہ!
ان کی قبر کو نور سے بھر دے
ان کے درجات بلند فرما
ان کی مغفرت فرما
ان کی اولاد کو صراطِ مستقیم پر قائم فرما
اور ان کی اولاد کو آپس میں مل جل کر رہنے کی توفیق عطا فرمائے۔اور ان کے لیے صدقہ جاریہ کا ذریعہ بنا ئے ۔
آمین ثم آمین

آخری احساس
بچھڑا کچھ اس ادا سے کہ رت ہی بدل گئی
ایک شخص سارے شہر کو ویران کر گیا

فقط
میرے بھائی کا دیا ہوا نام:
عبدالعلیٰ