سعودی عرب نے حج زائرین کے لیے نئے ضوابط جاری کر دیے
ریاض: سعودی عرب کی حکومت نے حج اور عمرہ کے انتظامات کو مزید منظم اور آسان بنانے کے لیے نئے قواعد و ضوابط کا اعلان کیا ہے۔ وزارتِ حج و عمرہ کے مطابق نیا "نُسُک کارڈ” اب ملکی اور غیر ملکی دونوں حاجیوں کے لیے لازم ہوگا۔
وزارت نے بتایا کہ یہ اقدام حج اور عمرہ کے سفر کو زیادہ سہل، محفوظ اور منظم بنانے کے لیے اٹھایا گیا ہے۔ نئے ضابطوں کے تحت سعودی عرب کے اندر رہنے والوں کو نُسُک کارڈ ڈیجیٹل شکل میں فراہم کیا جائے گا، جب کہ بیرونِ ملک سے آنے والے زائرین کے لیے یہ کارڈ پرنٹڈ صورت میں دستیاب ہوگا۔
سعودی حکام کے مطابق ہر سال لاکھوں کی تعداد میں بھارتی مسلمان حج کے لیے مکہ مکرمہ پہنچتے ہیں، اس لیے یہ نیا سسٹم ان کے لیے بھی سہولت اور وقت کی بچت کا باعث بنے گا۔
وزارتِ حج و عمرہ میں ڈیجیٹل ٹرانسفارمیشن کے انڈر سیکریٹری انجینئر عبدالعزیز المطاہمی نے بتایا کہ "نُسُک الاِعتمر” کے نام سے متعارف کی جانے والی اس پہل کا مقصد تمام ضروری خدمات کو ایک ہی آسان استعمال ہونے والے کارڈ میں اکٹھا کرنا ہے۔ ان کے مطابق یہ کارڈ زائرین کو متعدد خدمات تک براہِ راست رسائی فراہم کرتا ہے اور حج و عمرہ کی ادائیگی کو یکساں اور بے رکاوٹ بنانے میں اہم کردار ادا کرتا ہے۔
ان کا کہنا تھا کہ نُسُک کارڈ ایک یونائیفائیڈ سسٹم کے طور پر کام کرے گا، جس کے ذریعے ہر حاجی کی معلومات اور سہولیات ایک جگہ جمع ہوں گی، جس سے حج انتظامات مزید مؤثر اور منظم ہوں گے۔
