ریڈیئنٹ انسٹی ٹیوٹ ناندیڑ کے ہونہار طلبہ کی شاندار کامیابی

ناندیڑ: ریڈیئنٹ انسٹی ٹیوٹ آف فاؤنڈیشن اسٹڈیز، دیگلور ناکہ ناندیڑ میں آج ایک پُروقار اور متاثرکن تہنیتی تقریب کا انعقاد عمل میں آیا، جس میں اُن ہونہار طلبہ و طالبات کو اعزاز سے نوازا گیا جنہوں نے باوقار ڈاکٹر ہومی بھابھا ینگ سائنٹسٹ مقابلہ 2025–26 میں شاندار کامیابی حاصل کر کے ادارے، شہر اور ملک کا نام روشن کیا۔

اس تقریب کی صدارت ممتاز سرجن ڈاکٹر احسن زبیری نے بحیثیت مہمانِ خصوصی کی، جبکہ ڈاکٹر شاہد بطور خصوصی مہمان شریک رہے۔ دونوں معزز مہمانوں نے طلبہ سے خطاب کرتے ہوئے تعلیم کے ساتھ دین کی اہمیت، سائنسی فکر، مستقبل کی تعلیمی منصوبہ بندی اور کریئر رہنمائی پر نہایت قیمتی نکات پیش کیے۔ ان کے خطاب نے طلبہ میں خود اعتمادی، مقصدیت اور آگے بڑھنے کا نیا جذبہ پیدا کیا۔

قابلِ ذکر ہے کہ ڈاکٹر ہومی بھابھا ینگ سائنٹسٹ مقابلہ صرف چھٹی اور نویں جماعت کے طلبہ کے لیے مخصوص ایک نہایت معیاری اور سخت مقابلہ جاتی امتحان ہے، جو طلبہ کی سائنسی صلاحیتوں کو نکھارنے اور مستقبل کے چیلنجز کے لیے تیار کرنے میں اہم کردار ادا کرتا ہے۔ امتحان کے اعلیٰ معیار اور دشواری کے سبب بڑی تعداد میں طلبہ اس میں شرکت نہیں کر پاتے، جس کے نتیجے میں مسلم طلبہ اور اقلیتی تعلیمی اداروں کی نمائندگی نہایت کم نظر آتی ہے۔

اسی خلا کو محسوس کرتے ہوئے ریڈیئنٹ انسٹی ٹیوٹ آف فاؤنڈیشن اسٹڈیز، ناندیڑ نے اپنے تعلیمی وژن کے تحت طلبہ و طالبات کو اس سخت اور باوقار مقابلے میں شرکت کے لیے تیار کیا۔ ادارہ اس بات پر یقین رکھتا ہے کہ طلبہ کو ابتدا ہی سے مشکل ترین چیلنجز کا سامنا کروایا جائے تاکہ وہ مستقبل میں ملک، ملت اور دنیا کی قیادت کرنے والی ذمہ دارانہ نشستوں تک پہنچ سکیں۔

اس موقع پر ریڈیئنٹ انسٹی ٹیوٹ کے مینیجنگ ڈائریکٹر جناب ایس ایم صمیم نے کامیاب طلبہ کو دل کی گہرائیوں سے مبارکباد پیش کی اور اپنے خطاب میں محنت، نظم و ضبط اور مسلسل جدوجہد کی اہمیت پر زور دیا۔ انہوں نے اس کامیابی میں طلبہ کے ساتھ ساتھ اساتذہ اور والدین کے کردار کو بھی سراہا۔

تقریب کے اختتام پر جناب الطاف حسین سر نے اظہارِ تشکر پیش کرتے ہوئے مہمانانِ گرامی، اساتذہ، طلبہ اور والدین کا شکریہ ادا کیا۔ پروگرام کی نظامت نہایت خوش اسلوبی اور اعتماد کے ساتھ آٹھویں جماعت کی طالبات ازلفہ Azalfa، الفیہ Alfiya اور ہاجرہ Hajra نے انجام دی، جس سے ان کی صلاحیتوں اور خود اعتمادی کا بھرپور مظاہرہ ہوا۔

یہ تہنیتی تقریب ریڈیئنٹ انسٹی ٹیوٹ ناندیڑ کے اعلیٰ تعلیمی معیار، سائنسی شعور اور طلبہ کی ہمہ جہت ترقی و نشوونما کے مضبوط عزم کی عکاس ہے، جو آئندہ دنوں میں مزید نمایاں کامیابیوں کی بنیاد ثابت ہوگی۔