مسلم ایڈووکیٹ فورم ناندیڑ کی جنتر منتر دھرنے کی حمایت

ناندیڑ (ضلع نمائندہ): مسلم معاشرے کی عبادت گاہوں، املاک اور شہریوں پر ہونے والے مبینہ مظالم کے خلاف 17 ستمبر کو دہلی کے جنتر منتر پر منعقد ہونے والے دھرنے کی مسلم ایڈووکیٹ فورم ناندیڑ نے مکمل حمایت کی ہے۔ اس سلسلے میں فورم کی جانب سے حکومت کو اپنے مطالبات سے واقف کرانے کے لیے میمورنڈم پیش کیا گیا۔

میمورنڈم میں سہارنپور کی 115 سال قدیم مسجد کو 5 ستمبر کو صبح پانچ بجے بلڈوزر کے ذریعے منہدم کیے جانے کا ذکر کیا گیا ہے۔ فورم نے الزام عائد کیا کہ اس کارروائی سے مسلم معاشرے کے جذبات مجروح ہوئے ہیں۔

میمورنڈم میں بی جے پی حکومت کے دور میں مسلمانوں کے خلاف مبینہ ہجومی تشدد، عصمت دری کے ملزمین کے استقبال اور عوامی مقامات پر نماز ادا کرنے والے مسلمانوں کے خلاف مقدمات درج کیے جانے جیسے مسائل بھی اٹھائے گئے ہیں۔

فورم نے مطالبہ کیا کہ سہارنپور کی مسجد کو سرکاری خرچ پر دوبارہ تعمیر کیا جائے اور انہدام کے ذمہ دار افراد سے اس کا خرچ وصول کیا جائے۔ حکومت سے ان مطالبات پر توجہ دینے کی اپیل کی گئی ہے۔