نوی ممبئی ایئرپورٹ: ستمبر 2025 سے پروازوں کا آغاز، ترقیاتی کام آخری مرحلے میں
نوی ممبئی، 25 جون 2025 نوی ممبئی میں زیر تعمیر بین الاقوامی ہوائی اڈہ اپنی تکمیل کے قریب ہے اور ستمبر 2025 سے یہاں سے بین ریاستی پروازوں کا آغاز کیا جائے گا۔ یہ بات ماول کے رکن پارلیمنٹ شری رنگ بارنے نے ہوائی اڈے کے دورے کے دوران کہی۔ اس موقع پر انہوں نے اڈانی گروپ اور سڈکو کے افسران کے ساتھ میٹنگ کر کے پروجیکٹ کی پیش رفت کا جائزہ بھی لیا۔
بارنے نے بتایا کہ یہ ہوائی اڈہ پونے اور ممبئی کو جوڑنے والا ایک مرکزی فضائی مرکز ہوگا، جسے ملک کے دیگر بڑے ٹرانسپورٹ نیٹ ورکس جیسے میٹرو، واٹر ٹیکسی، لوکل ٹرین اور مستقبل کی ممبئی-حیدرآباد بلٹ ٹرین سے جوڑا جائے گا۔
اہم خصوصیات: یکم ستمبر 2025 سے ٹرمینل ون آپریشنل ہوگا، جس میں سالانہ 2 کروڑ مسافروں کی گنجائش ہوگی۔
یہ ملک کا پہلا ہوائی اڈہ ہوگا جہاں انٹر ٹرمینل کنیکٹیویٹی دستیاب ہوگی۔
ہوائی اڈے کو 1150 ہیکٹر رقبے پر تعمیر کیا جا رہا ہے اور یہاں زیرِ زمین فیول پائپ لائن سسٹم بھی متعارف کیا جائے گا۔
منصوبے کے مکمل ہونے پر 90 ملین سالانہ مسافروں کو سنبھالنے کی صلاحیت حاصل ہوگی۔
شری رنگ بارنے نے کہا کہ یہ پروجیکٹ 16700 کروڑ روپے کی لاگت سے تیار ہو رہا ہے اور یہ ممبئی کے موجودہ ہوائی اڈے پر دباؤ کو کم کرے گا۔ حتمی مرحلے میں یہاں 4 ٹرمینلز، 2 رن وے، VIP ٹرمینل، جنرل ایوی ایشن زون اور ملک کا سب سے بڑا کارگو ہب قائم کیا جائے گا۔ سب سے طویل رن وے 3.7 کلومیٹر کا ہوگا، جس پر ایئربس A380 جیسے بڑے طیارے لینڈ کر سکیں گے۔
بین الاقوامی پروازیں کب شروع ہوں گی؟
بین الاقوامی فضائی سروسز کا آغاز 2029 تک متوقع ہے۔
پروجیکٹ کا 80 فیصد کام، بشمول ٹرمینل ٹو، 2029 تک مکمل ہوگا اور 2036 تک مکمل ہوائی اڈہ آپریشنل ہو جائے گا۔
پبلک انڈرٹیکنگ کمیٹی کا دورہ: نوی ممبئی ایئرپورٹ کی نگرانی کے لیے ودھان سبھا کی پبلک انڈرٹیکنگ کمیٹی سرگرم ہو گئی ہے، جس کے صدر ایڈوکیٹ راہل کل ہیں۔ 25 جون کو کمیٹی ایئرپورٹ کا معائنہ کرے گی۔ کمیٹی کے رکن ایم ایل اے رئیس شیخ نے تصدیق کی ہے کہ اس موقع پر افسران ایئرپورٹ کی تیاریوں پر تفصیلی بریفنگ دیں گے۔
یہ ہوائی اڈہ نہ صرف خطے کے لیے بلکہ پورے مہاراشٹر اور ملک کے اقتصادی ڈھانچے کے لیے ایک اہم سنگ میل ثابت ہوگا۔
