نظام آباد میں سودی کاروبار کے خلاف پولیس کی بڑی کارروائی

نظام آباد، 2٤ اگست : نظام آباد پولیس کمشنریٹ کے حدود میں سودی کاروبار کرنے والوں کے خلاف پولیس نے بڑی کارروائی کی۔ پولیس کمشنر سائی چیتنیا کے احکامات پر 10 ٹیموں پر مشتمل پولیس عملہ نے ضلع کے مختلف مقامات پر اچانک دھاوے کرتے ہوئے فینانسروں کے گھروں اور دفاتر کی تلاشی لی۔

ذرائع کے مطابق پولیس کمشنر کو حالیہ دنوں پرجاوانی پروگرام کے دوران عوامی شکایات موصول ہوئی تھیں کہ بعض فینانسروں نے عوام کی جائیدادیں گروی رکھوا کر (سیل رجسٹریشن کے ذریعے) زیادہ شرح سود پر قرضے دئیے اور بغیر لائسنس کے فنانس بزنس چلا رہے تھے۔ انہی شکایات کی بنیاد پر یہ کارروائی عمل میں لائی گئی۔

پولیس افسران نے نظام آباد شہر کے ساتھ ساتھ بودھن اور آرمور ڈویژن میں بھی اچانک چھاپے مارے۔ اس دوران متعلقہ اے سی پی کی نگرانی میں سرکل انسپکٹران اور سب انسپکٹران نے ساہوکاروں کے سودی لین دین کے ریکارڈ اور دستاویزات کی جانچ کی۔