آپریشن ’کریک ڈاؤن‘ کے تحت ناندیڑ میں غیر قانونی اسلحہ کا بڑا ذخیرہ ضبط؛ 14 لاکھ سے زائد مالیت کا سامان برآمد
ناندیڑ نمائندہ / ناندیڑ ضلع میں جرائم پر قابو پانے کے لیے جاری آپریشن ’کریک ڈاؤن‘ کے تحت مقامی کرائم برانچ نے بڑی کارروائی کرتے ہوئے فروخت کے لیے رکھے گئے غیر قانونی اسلحہ کے بڑے ذخیرے پر چھاپہ مارا اور 703 خطرناک ہتھیار ضبط کیے۔ اس کارروائی میں 14 لاکھ 4 ہزار 300 روپے مالیت کا سامان برآمد کیا گیا، جبکہ ملزم موقع سے فرار ہونے میں کامیاب ہوگیا۔
مقامی کرائم برانچ، ناندیڑ کی اس کارروائی میں ملزم کی شناخت رنجیت سنگھ رام سنگھ سردار ساکن نندی گرام سوسائٹی، ناندیڑ کے طور پر ہوئی ہے۔ پولیس نے اس کے خلاف مقدمہ درج کر لیا ہے اور گرفتاری کے لیے خصوصی ٹیمیں روانہ کر دی گئی ہیں۔
پولیس ذرائع کے مطابق ناندیڑ ضلع میں غیر قانونی ہتھیار رکھنے اور فروخت کرنے والوں کے خلاف سخت کارروائی کے احکامات پولیس سپرنٹنڈنٹ ابیناش کمار نے جاری کیے تھے۔ اس کے بعد مقامی کرائم برانچ کے پولیس انسپکٹر اتُل بھوسلے نے پولیس سب انسپکٹر ملیند سونکامبلے اور ان کی ٹیم کو خفیہ معلومات کی بنیاد پر کارروائی کرنے کی ہدایت دی۔
22 مئی 2026 کو پولیس انسپکٹر اتُل بھوسلے، سب انسپکٹر ملیند سونکامبلے اور ان کی ٹیم گشت پر تھی کہ انہیں دینا بینک سے سچکھنڈ گوردوارہ روڈ پر واقع 300 سالانہ شاپنگ پلازہ کی دکان نمبر 08 میں غیر قانونی طور پر تلواریں، خنجر اور دیگر خطرناک ہتھیار فروخت کیے جانے کی خفیہ اطلاع ملی۔ اعلیٰ افسران کی ہدایت پر سب ڈویژنل پولیس افسر کرن بھونڈوے کی موجودگی میں پولیس ٹیم نے دکان پر چھاپہ مارا۔
تاہم پولیس کی آمد کی اطلاع ملتے ہی دکان مالک رنجیت سنگھ رام سنگھ سردار موقع سے فرار ہوگیا۔ بعد ازاں پولیس نے دکان کی تلاشی لی تو وہاں سے بھاری مقدار میں اسلحہ برآمد ہوا، جس میں 470 تلواریں (مالیت 12 لاکھ 31 ہزار روپے)، 209 خنجر اور چاقو (مالیت 1 لاکھ 70 ہزار 900 روپے) اور 24 فائٹر/پنچ (مالیت 2 ہزار 400 روپے) شامل ہیں۔ اس طرح مجموعی طور پر 703 غیر قانونی ہتھیار ضبط کیے گئے جن کی کل مالیت 14 لاکھ 4 ہزار 300 روپے بتائی گئی ہے۔
ضبط شدہ سامان کو وزیرآباد پولیس اسٹیشن کے حوالے کر دیا گیا ہے اور ملزم کے خلاف مقدمہ درج کیا گیا ہے۔ فرار ملزم کی تلاش کے لیے پولیس کی خصوصی ٹیمیں مختلف مقامات پر چھاپے مار رہی ہیں۔
پولیس کی اس جرات مندانہ کارروائی کے بعد غیر قانونی اسلحہ کی خرید و فروخت اور ذخیرہ کرنے والوں میں خوف کا ماحول پیدا ہوگیا ہے۔
