ممبئی میں نابالغ لڑکیوں کے جنسی استحصال کا سنسنی خیز انکشاف، 15 سے زائد متاثرہ لڑکیوں کی ویڈیوز برآمد، تین گرفتار
ممبئی، 12 نومبر (ایجنسیز) شہر میں نابالغ لڑکیوں کے جنسی استحصال کا ایک انتہائی سنگین معاملہ سامنے آیا ہے، جہاں پولیس نے تین ملزمین کو گرفتار کیا ہے، جبکہ دو دیگر ملزمین کی تلاش جاری ہے۔ معاملے کی تفتیش کے دوران ملزمین کے موبائل فون سے 15 سے زائد نابالغ لڑکیوں کی قابل اعتراض ویڈیوز برآمد ہونے کا دعویٰ کیا گیا ہے، جس کے بعد پولیس نے تحقیقات کا دائرہ وسیع کر دیا ہے۔میگزین پڑھیں
پولیس کے مطابق یہ معاملہ ممبئی کے سمتا نگر پولیس اسٹیشن کے تحت آنے والے ہنومان نگر علاقے سے متعلق ہے، جہاں مبینہ طور پر ایک 14 سالہ لڑکی کو جنسی زیادتی کا نشانہ بنایا گیا۔ الزام ہے کہ ملزم نے متاثرہ لڑکی کی ویڈیو بنانے اور اسے منظر عام پر لانے کی دھمکی دے کر اس پر دباؤ ڈالا اور اس کا مسلسل جنسی استحصال کیا۔
معاملے کی تفتیش کے دوران پولیس نے ملزمین کے موبائل فون ضبط کرکے ان کی جانچ کی تو ان میں 15 سے زائد نابالغ لڑکیوں کی قابل اعتراض ویڈیوز موجود ہونے کا انکشاف ہوا۔ پولیس اب یہ معلوم کرنے کی کوشش کر رہی ہے کہ یہ ویڈیوز کب اور کن حالات میں بنائی گئیں، ان میں کون کون ملوث ہے اور آیا مزید نابالغ لڑکیاں بھی اس استحصال کا شکار ہوئی ہیں۔
ابتدائی اطلاعات کے مطابق اس معاملے میں مجموعی طور پر پانچ افراد کے ملوث ہونے کا شبہ ظاہر کیا گیا ہے۔ سمتا نگر پولیس نے ان میں سے تین ملزمین کو گرفتار کرلیا ہے، جبکہ دو دیگر ملزمین فرار ہیں۔ پولیس ان کی تلاش کے ساتھ گرفتار افراد سے بھی تفصیلی پوچھ گچھ کر رہی ہے۔پودے پہچانیں
اس معاملے کو لے کر بجرنگ دل کے کارکنوں نے احتجاج بھی کیا۔ بعد ازاں پولیس نے کارروائی کرتے ہوئے ملزمین کے خلاف پوکسو (POCSO) ایکٹ کے تحت مقدمہ درج کیا اور تین افراد کو گرفتار کرلیا۔
پولیس حکام کے مطابق معاملے کی مکمل جانچ کے لیے خصوصی ٹیم تشکیل دی گئی ہے۔ تفتیش کے دوران برآمد شدہ ویڈیوز، ان کے ممکنہ ذرائع اور دیگر مشتبہ افراد کے کردار کا جائزہ لیا جا رہا ہے۔ پولیس کا کہنا ہے کہ معاملے میں ملوث ہر شخص کے خلاف قانون کے مطابق کارروائی کی جائے گی۔
