حد گاؤں میں مسلم نوجوان پر مبینہ گاؤ رکشکوں کا جان لیوا حملہ، شدید زخمی
حد گاؤں (نمائندہ) – حد گاؤں میں گزشتہ روز ایک مسلم نوجوان پر مبینہ طور پر “گاؤ رکشکوں” کی جانب سے جان لیوا حملہ کیے جانے کا سنسنی خیز واقعہ پیش آیا، جس کے نتیجے میں نوجوان شدید زخمی ہو گیا۔
ذرائع کے مطابق متاثرہ نوجوان کی شناخت صدام لاداف کے طور پر ہوئی ہے، جو اپنی گاڑی میں سیب (ایپلز) لے جا رہا تھا۔ اسی دوران چند افراد نے اس پر گاڑی میں بیف ہونے کا الزام عائد کرتے ہوئے اسے روکا اور مبینہ طور پر ہتھیاروں سے حملہ کر دیا۔ اس اچانک حملے میں صدام لاداف کو شدید چوٹیں آئیں، جس کے بعد انہیں فوری طور پر علاج کے لیے قریبی اسپتال منتقل کیا گیا۔
عینی شاہدین کے مطابق حملہ آوروں کی تعداد زیادہ تھی اور انہوں نے نوجوان کو گھیر کر تشدد کا نشانہ بنایا، جس سے علاقے میں خوف و ہراس کا ماحول پیدا ہو گیا۔ واقعہ کے بعد مقامی شہریوں میں شدید غم و غصہ پایا جا رہا ہے اور ملزمان کے خلاف سخت کارروائی کا مطالبہ کیا جا رہا ہے۔
ذرائع نے یہ بھی بتایا کہ اس واقعہ میں ملوث افراد کے خلاف سخت قانونی کارروائی عمل میں لائی جائے گی اور پولیس کی جانب سے معاملے کی تفتیش شروع کر دی گئی ہے۔
اس موقع پر صدام لاداف کے ساتھ جناب و دیگر افراد موجود رہے اور انہوں نے متاثرہ نوجوان کی عیادت کرتے ہوئے انصاف کی فراہمی کا مطالبہ کیا۔
مقامی سماجی و مذہبی رہنماؤں نے اس واقعہ کی شدید مذمت کرتے ہوئے کہا کہ ایسے واقعات معاشرے میں نفرت اور بدامنی کو فروغ دیتے ہیں، لہٰذا ذمہ داران کے خلاف فوری اور سخت کارروائی ناگزیر ہے۔
