عباداللہ خان کو کامرس میں پی ایچ ڈی کی ڈگری تفویض
سولاپور (اِقبال باغبان ) : شعبۂ تعلیم سے وابستہ عباداللہ اسداللہ خان، یونیک ایجوکیشنل سوسائٹی کے ٹرسٹی، ڈاکٹر اسداللہ خان انگلش ہائی اسکول اینڈ جونیئر کالج، شولاپور کیمپس کے سابق پرنسپل اور شیل کیمپس تھانے کے موجودہ پرنسپل نے کامرس (Commerce) کے شعبے میں پی ایچ ڈی کی ڈگری حاصل کرکے اپنی علمی و تعلیمی زندگی میں ایک اہم سنگِ میل عبور کیا ہے۔ انہوں نے ایشین انٹرنیشنل یونیورسٹی، امپھال ویسٹ، منی پور سے اپنی ڈاکٹریٹ کی تحقیق مکمل کی۔
یونیورسٹی کے ریسرچ ڈپارٹمنٹ کی جانب سے جاری کردہ باضابطہ اطلاع کے مطابق، عباداللہ خان نے 8 اگست 2026ء کو شعبۂ کامرس میں اپنے پی ایچ ڈی وائیوا ووس (Ph.D. Viva-Voce) کا کامیابی سے دفاع کیا۔
اس علمی کامیابی پر اہلِ خانہ، دوستوں، اساتذہ، تعلیمی حلقوں اور متعلقین کی جانب سے ڈاکٹر عباداللہ خان کو مبارک باد پیش کی گئی اور ان کے روشن علمی و تعلیمی مستقبل کے لیے نیک خواہشات کا اظہار کیا گیا۔
اس موقع پر منعقدہ ایک مختصر تہنیتی نشست میں ان کی اس کامیابی کو محض ایک اعلیٰ تعلیمی سند کے حصول کے بجائے مسلسل محنت، علمی جستجو اور اعلیٰ تعلیم سے وابستگی کا ثمر قرار دیا گیا۔ شرکاء نے امید ظاہر کی کہ وہ اپنی تحقیق، علم اور تجربے کو تعلیمی اداروں اور نئی نسل کی علمی و فکری تربیت کے لیے بروئے کار لائیں گے۔
تصویر: پی ایچ ڈی کامیابی کے ساتھ مکمل کرنے پر ڈاکٹر عباداللہ خان کو اہلِ خانہ اور متعلقین مبارک باد پیش کرتے ہوئے۔
