سولاپور میں لوک شاہی فاؤنڈیشن کی طرف سے میونسپل اردو اسکول نمبر 1 اور نمبر5 میں مفت آنکھوں کی جانچ 180 طلبہ کی جانچ، 20 کو چشمےفراہم کیے گئے
سولاپور(اِقبال باغبان) : ڈاکٹر بابا صاحب امبیڈکریومِ پیدائش کے موقع پر لوک شاہی فاؤنڈیشن، سولاپور کی طرف سے بیگم پیٹھ کے میونسپل اردو بوائز اسکول نمبر 1 کے 100 اور میونسپل اردو گرلز اسکول نمبر 5 کے 80 طلبہ کے لیے مفت آنکھوں کی جانچ اور چشمہ تقسیم کیمپ کا انعقاد کیا گیا۔اس کیمپ میں کل 180 طلبہ کی آنکھوں کی جانچ کی گئی، جن میں سے 20 طلبہ کو چشمے کی ضرورت پائی گئی۔ ان تمام طلبہ کو جلد ہی لوک شاہی فاؤنڈیشن کی طرف سے مفت چشمےفراہم کیئے جائیں گے۔
اس کیمپ کا افتتاح جیل روڈ پولیس اسٹیشن کے پولیس انسپکٹر شیواجی راؤت کے ہاتھوں کیا گیا۔ اس موقع پر سابق کارپوریٹر ریاض باغبا ن، لوک شاہی فاؤنڈیشن کے بانی صدر اور ماہرِ چشم ڈاکٹر وسیم راجہ باغبا ن، ایڈووکیٹ مبین باغبان اور اسکول کی پرنسپل نسرین بانو، الطاف سورنجی، توصیف شیخ وغیرہ موجود تھے۔
پروگرام میں خطاب کرتے ہوئے ڈاکٹر وسیم راجہ باغبان نے کہا کہ چھوٹے بچوں میں نظر کی کمزوری بڑھ رہی ہے۔ اگر شروع میں -0.25 یا -0.5 نمبر ہو تو بروقت بلو فلٹر چشمہ استعمال کرنے سے 2 سے 3 مہینوں میں اسے قابو میں لایا جا سکتا ہے۔ لیکن اگر وقت پر علاج نہ کیا جائے تو نمبر بڑھ سکتا ہے اور زندگی بھر چشمہ لگانا پڑ سکتا ہے۔
لوک شاہی فاؤنڈیشن کئی سالوں سے مختلف اسکولوں اور علاقوں میں جا کر مفت آنکھوں کے کیمپ لگاتی آ رہی ہے۔سال 2024 سے 2025 کے دوران تقریباً 5000 طلبہ کی جانچ کی گئی اور کئی ضرورت مند بچوں کو مفت چشمے دیے گئے۔ادارے کا مقصد صرف علاج کرنا نہیں بلکہ طلبہ میں آنکھوں کی صحت کے بارے میں بیداری پیدا کرنا بھی ہے۔
